Hneh nei loin Medvedev a tla

French Open seeded pahnihna Daniil Medve-dev chu mi hriat hlawh ni vak lo Thiago Seyboth Wild hneh loin a zinkawng a tawp nghal. Russian tlangval hi 7-6(5), 6-7(6), 2-6, 6-3, 6-4 in a chak lo a ni.

Season dangah chuan Medvedev hi clay court-ah a khel ṭha ngai vak lo, mahse tun season chu inelna hmasa lamah player hlauhawm berte zinga mi a ni phak. Beiseina sang tak nen French Open a khel a, amaherawhchu a tan clay court chu hmun duhawm a ni rei thei ta lo.

Thawhlehni zan khan Court Philippe-Chatrier-ah thli a thaw a, player tan inkhelh a awlsam lo. World number 172 Seyboth Wild tan phei chuan French Open vawi khat khelhna a nih bakah player langsar a hmachhawn avangin a zamawm ve khawp ang.

Darkar li leh minute 15 zet an inkhelh hnuah Seyboth Wild a dingchang ta zawk a, chak lo Medvedev tan French Open 2023 a tawp bakah world number 1 nih theihna remchang a neih chu a tawp zui nghal bawk.

Kum 23 mi Seyboth Wild chuan, "Junior player ka nih lai aṭangin Daniil-a inkhel ka en ṭhin, tuna ani ka hmachhawn thei ringawt pawh hi duhthusam tam tak zinga pakhat thleng dik chu a ni tawh sa.

"Forehand ka hman nasat chuan ka tan kawng a inhawng ve turah ka ngai a, mak tak maiin kan ruahmanna chu a hlawhtling," a ti. Tun season kal laia tournament a khelh hmasak ber a nih avangin a tan chuan a mak zual ang.

Chak lo mah se Medvedev pawh a lawm tho. Monte Carlo Masters leh Madrid Open te ṭha taka a khelh hnuah Italian Open nomawi a chawi a, heng thil hi season danga a tih theih ngai loh a ni - a tan chuan clay court season ṭha taka chhiar theih a la ni tho.

World number 2 Medvedev chuan, "Thli thaw khan lei a chhem leng nasa a, chu chuan harsatna pawh min siamsak ve deuh. Player ṭhenkhat chuan an bag, pheikhawk, mawza leh thuamhnaw balte hi inkhelhna vang a nih chuan hmuh nuam an ti a ni mai thei.

"Keichuan lei dip vanga hetiang thleng hi ka ngaina hran lo," a ti. Russian tlangval hian a dinhmunah a lungawi tih a sawi a, a service hmasa a ṭha tawk lo ṭhin chu a tan harsatna thlentu pakhat a nih thu a sawi tel bawk.

Inkhel dangah Alexander Zverev a chak. Season hmasa French Open khelh laia hliam na tak tuartu Zverev hian Lloyd Harris chu 7-6 (8-6), 7-6 (7-0), 6-1 in a hneh a, kum khat zet a liam hnu chuan a kerek hliam pawh a dam fel tawh.

Kum 26 mi Zverev chuan, "Paris khawpuia ka inkhel leh thei ta chu a lawmawm takzet a ni. Nikuma ka hun tawp hman dan kha hrehawm ka ti hle a, chuvangin ka tan inkhelh leh theih hi a lawmawm," a ti.

Rafael Nadal nen an inkhelh laiin Zverev hi a kerek a hliam a, a hliam vang hian thla ruk chhung lai inkhel thei loin a awm. Tunah erawh thawnthu a danglam leh ta, a match lehpekah chuan Alex Molcan a hmachhawn leh dawn a ni.

Inkhel dangah season hmasa pahnihna Casper Ruud chuan Elias Ymer 6-4, 6-3, 6-2 a hneh a, qualifying paltlanga inlan Giulio Zeppieri nen an intum leh ang. Seeded parukna Holger Rune pawhin Christopher Eubanks chu 6-4, 3-6, 7-6 (7-2), 6-2 in a ngam.