FA Cup final khel lo tur Martial

Manchester United tan chanchin lawmawm lo pakhat a awm, an forward ṭha Anthony Martial chu Inrinni zana Manchester City nen FA Cup final an khelh hunah a inlan ve thei dawn lo, a inkhelh theih loh tur thu hi club lamin an puang chiang tawh.

Erik ten Hag-a'n Man United a enkawl tirh aṭangin Martial hi a chhawr rim a, hman ṭangkai a tum viau. Mahse, France international hi hliamin a tlabuak ngun lutuk a, a nih tur leh a pawimawh tur angin a dinhmun a luah phak lo.

Kar tawpa Fulham nen Old Trafford-a Premier League an khelh ṭum khan Martial hi a inlan a, player pawimawh pawh a ni. Mahse, a malpui a hliam leh a, a hliam hi tun kar tawpah chuan a dam hman dawn lo a ni.

Martial bakah hian Antony chu hliam vangin a chawl mek bawk. Brazil international hi Chelsea an hneh ṭuma a hliam kha tun tlengin a la inkhel thei lo - Man City a hmachhawn thei dawn em, tih a la chiang bik lo.

Man United tan Citizens nen an inkhel tur hi a pawimawh. February thla khan League Cup nomawi an lo chawi tawh a, an ṭhenawm club hneha FA Cup an la thei bawk a nih chuan season ṭha tak a ni ngei ang.

Ten Hag-a naute tan champion hi thil awlsam tak erawh a ni dawn lo. Pep Guardiola naute hi Premier League champion an nih bakah Champions League final lut thei an ni - Manchester club pahnihin an khelh tur kumin FA Cup final hi a hmuhnawm dawn.