Liverpool sporting director thar Schmadtke - eng nge hmachhawp?

Season thara Champions League khel lo tur Liverpool chuan Sporting Director thar an lalut a, a hming chu Jorg Schmadtke a ni - February thleng khan Wolfsburg-ah Sporting Director hna a chelh.

Liverpool chuan thuchhuah siamin, "Jorg hian a hriatna zau tak leh tawnhriat ṭha tak tak a hman theihna tur hna chelhin, keini leh ama tana hmasawnna thlen thei hna a thawk dawn a ni," an ti a, an Sporting Director thar chu an dah sang hle.

Kum 59 mi Schmadtke hian Anfield-a kum 11 zet a cham hnua chhuak tur Julian Ward a thlak dawn a, Liverpool chuan, "Jorg hi operation department nen thawk hoin, kan hmachhawp mekte hre reng chungin kan manager Jurgen Klopp an thlawp dawn a ni," an ti.

Liverpool chuan, "Jorg kan lawm rualin, he club-a hna hrang hrang ṭha taka thawk a, rei tak kan hnena lo awm tawh, Julian Ward chu ui tak chungin kan thlah a ni," an ti bawk.

Klopp a thu dawn

Liverpool-in sporting director thar Jorg Schmadtke an nei a, transfer-a thutawp siamtu tur erawh boss Jurgen Klopp a la ni dawn tho - German coach ngainatute tan thu hriat nuam a ni ang.

Schmadtke chuan, "Germany ai chuan England-ah coach-in transfer chungchangah thu an nei zawk," a ti a, Germany-ah chuan sport board member leh sporting director ten thutlukna an siam ṭhin thu a sawi bawk.

German pa Schmadtke chuan Klopp nena an thawh dun dan tur sawi zuiin, "Jurgen Klopp hian a duh player thlangin, ngaih pawimawh hmasak tura a duh a sawi ang. Keinin, data analysts leh scout hmangtein kan zirchiang ve leh ang," a ti.

Kum 59 mi Schmadtke chuan Klopp-a agent Marc Kosicke chuan Fenway Sports Group president Mike Gordon nen a inhmelhriattir thu sawiin, chumi kaltlanga Reds zawm thei a nih thu a sawi.

Eng nge hmachhawp?

Liverpool hian James Milner, Naby Keita, Alex Oxlade-Chamberlain leh Roberto Firmino an chhuahtir fel der tawh a, coach Jurgen Klopp chuan nipui transfer-ah an chet tur thu a lo sawi tawh.

Tun dinhmuna Reds nena sawizawm langsar ber chu Alexis Mac Allister a ni a, Brighton & Hove Albion midfielder hian a zawm ngei pawh a rinawm - Klopp-a'n Mason Mount duh viau mah se Chelsea attacking midfielder hian Manchester United tana khelh a duh zawk, nia sawi a ni.

Bayern Munich midfielder Ryan Gravenberch hming pawh lam rik a ni a, Leicester City-a contract hmang zo tur Youri Tielemans hming pawh a ri ring viau. West Ham captain Declan Rice hi sawi ri tawk awm mah se a man zat ngaihtuahin Jude Bellingham lei ngam lotu Reds-in an lakluh theih a rinawm lo.

Liverpool hi tlarhma lam a ngaihtuahawm lo a, mahse, midfield erawh inthuam ṭhat an ngai - an sawi zingah RB Leipzig attacking midfielder Dominik Szoboszlai, Nice midfielder Khephren Thuram, Inter Milan rinrawl Nicolo Barella leh Wolverhampton Wanderers duhlai Matheus Nunes te an tel.