Poch-a'n Joao Felix a chelh duh lo!

Chelsea chuan loan hmanga an hawh Joao Felix chu an la nghet dawn lo. Atletico Madrid president Enrique Cerezo sawi dan chuan Blues hian an club aṭanga an player an hawh hi a ngheta lak an duh lo a ni.

January bazarah khan Felix hian loan hmangin Chelsea hi a zawm. London club tan hian inelna hrang hranga match 20 khelin goal 20 a khungsak a, an inrem dan chuan Blues hian a nghetin an la thei ang.

Mahse, coach thar Mauricio Pochettino chuan Portuguese forward hi chelh a tum lem lo. Atletico Madrid president Enrique Cerezo chuan, "Tuna kan thu hriat thar berah chuan Blues coach-in Felix hi a la nghet duh lo.

"He thu hi kan hriatna a la rei lo, tunah chuan kan hnenah a lo kir leh phawt ang a, chumi hnuah a ṭha ber tur kan ngaihtuah ang. A nihna tak sawi chuan a hma hun turah hian ruahmanna siamsa kan nei lo," a ti.

Atletico Madrid hian 2019 khan Benfica aṭangin Felix hi an lalut a, pound maktaduai 113 man zet a ni - a hunlai chuan khawvela player man to pangana a ni phak hial.

Beiseina nei sang viau mah se Spanish club tan an beisei angin a khel chhuak rih lo. Inelna hrang hrangah match 131 aṭangin goal 34 a khungsak tawh a, kum 2020-21 season khan La Liga nomawi chu a chawipui.