Messi hoa inlan tur Argentina

World champion Argentina chuan Australia leh Indonesia nena friendly match khel tur squad an puang a, player 27 koh zingah Lionel Messi chu hming langsar ber a ni a, rawlthar Alejandro Garnacho leh PSV keeper Walter Benítez te chu a vawi khat nan koh an ni.

Argentina hian Qatar World Cup nomawi an chawi hnuah match hnih an khel tawh. Panama chu Messi goal hmangin an hneh a, a hnuah Curacao lakah Argentina captain hian hattrick a siam zui leh bawk.

Coach Lionel Scaloni chuan striker Lisandro Martinez a ko rih lo. Inter Milan tana Champions League khelh hmabak hi hun awl a pe. Martinez a awm loh chuan tlarhma lamah Manchester City striker Julian Alvarez chungah mawhphurhna a awm dawn.

Messi leh Angel di Maria te chuan goal nawr lamah player naupang ho an kaihruai dawn a, midfield lailum luah turin Alexis Mac Allister leh Enzo Fernandes te an awm, tlarhnung lamah Nicolas Otamendi chuan a la ho khawm thei dawn bawk a ni.

Argentina hi FIFA ranking-ah pakhatna an ni mek a, an match hmabak pahnihah hian an chak a nih chuan an dinhmun an sawhnghet zual ang.