Harsa takin Gauff a chak

Coco Gauff chuan French Open 2023 a match hmasa berah fiahna hautak a hmachhawn nghal, inkhel inhnehtawk takah Gauff hian Rebeka Masarova chu 3-6, 6-1, 6-2 in a hneh hram.

Season hmasa khan Gauff hian final a lut, mahse nomawi inchuhna inkhelah Iga Swiatek a ngam lo. Hnehna a chan hnuah American tleirawl hian Eastern Conference Finals chu a rilru tipaukhauhtu a nih thu a sawi.

Eastern Conference Finals-ah hian Miami Heat chuan Boston Celtics lakah 3-0 a series hma an hruai hnuin 3-3 a ni a, game 7 leh inkhel pawimawh ber ni bawkah Celtics luhchhuahin Heat an chak.

Gauff chuan, "Set lak hnuah pawh hloh ve leh theih a ni a, chutiang chiah chuan basketball huangah pawh him tak tak a awm thei lo tih a takin kan hmu zo chiah. Heat khan beidawng lo leh huaisen takin game hnuhnung ber an khel, khatiang khan set hnuhnung ber pawh kha kan khel," a ti.

Champion lai leh world number 1 ni bawk Swiatek tan erawh harsatna tur a awm lo. Polish nula hian Cristina Bucsa chu 6-4, 6-0 in a sawp. Zanin hian Claire Liu nen an inhmachhawn leh ang.

Kum 22 mi Swiatek chuan, "Ka service hmasa pathum zinga pahnih min chhuhsak a, a nihna tak sawi chuan rilru a nuam lo hman angreng hle. Mahse, ka game pangngai ka khel chhunzawm thei a, ka chiai zui bik lo.

"Player dangte pawhin bul ṭan fuh loh chang an nei ve tho a, chutiang chu ka chungah a thleng ve ni maiah ka ngai," a ti. Nimin khan Swiatek hian kum 22 a tling ve chiah a, inelna lian Grand Slam bikah chauh pawh vawi thum lai a champion tawh.

Inkhel dangah seeded pasarihna Ons Jabeur chuan Lucia Bronzetti chu 6-4, 6-1 in a hneh a, Wimbledon champion Elena Rybakina pawhin Brenda Fruhvirtova chu 6-4, 6-2 in a hneh ve bawk.

Player langsar dang inkhelah 2021 champion Barbora Krejcikova chu a chak lo, a khingpui Lesia Tsurenko lakah 6-2, 6-4 in a tlawm. US Open champion hlui Bianca Andreescu erawhin set a hloh hmasak hnuah Victoria Azarenka chu 2-6, 6-3, 6-4 in a hneh.