Hmeichhe World Cup atan ticket hralh hnem

July 20 aṭanga khelh ṭan tur Hmeichhe football World Cup atan ticket hralh a kal hle - Australia leh New Zealand-a khelh tur inelna atan hian ticket 850,000 chuang hralhchhuah a ni tawh.

FIFA secretary general Fatma Samoura chuan, "Kum 2023 hi hmeichhe football tan chuan kum hriatreng tlak a ni dawn a ni," a ti a, FIFA thupuangtu chuan ticket maktaduai khat an hralh tlin har a rin loh thu a sawi.

Women's World Cup 2023 hi Hmeichhe World Cup vawi kua neih a nihna a ni a, inelna buaipuitute chuan ticket maktaduai 1.5 hralh tlin an tum a, television lamah mi tluklehdingawn hnih talin an thlir an beisei.

Eden Park, Auckland-ah World Cup hawnna match chu July 20 hian khelh a ni dawn a, chhun dar 12:30-ah inelna thlengtu pakhat zawk New Zealand leh champion hlui Norway te an inkhel ang.

Inelnaah hian team 32 inlanin, group pariatah ṭhen an ni a, group tina a sang pahnih chu last 16 an lut dawn a ni - August 20-ah, Stadium Australia, Sydney-ah final khelh a ni dawn a ni.