1st Bn MAP Ground-ah ennawm hmuhnawm: ITI Veng Vs Durtlang; Republic Veng Vs Bawngkawn

Mizoram 'World Cup' ti hiala an sawi LBS Suzuki 21st Inter Branch YMA Football Tournament-ah boruak a sang chho zel a, vawiin hian 1st Bn MAP Ground, Armed Vengah final-a inhmachhawn tur atan pawha zahpuiawm lo match hnih a awm dawn.

Vawiin chawhma dar 11:00-ah ITI Veng leh Durtlang an inkhel dawn. ITI Veng hi champion lai Chanmari hnehtu an ni a, Durtlang hi vawi thum champion tawh Electric Veng hnehtu an ni thung.

Chawhnu dar 1:30-ah Republic Veng leh Bawngkawn an inkhel dawn a, inkhel en châkawm bik a tling pha. Republic Veng hi football thiam veng ni saltliah loin 2005 CYMA Football champion an ni a, Bawngkawn hi player nei ṭha veng an nih bakah coach lar K. Malsawmkima enkawl an ni.

Player ṭha rual

ITI Veng hian champion lai Chanmari an hneh a ni ringawt lo a, tun ṭum inelnaah hian Chanmari hi an ṭhat avangin Zohmangaiha (Tetea) enkawl team hi an ṭha tih a chiang hle.

Tetea hi SYS FC-in 2012 MFA Cup an champion ṭuma defender pawimawh a ni a, ITI Veng chhuanvawr a ni. ITI Veng coach Tetea chuan, "Kumin hi kan ṭhat ber ṭumah ka ngai a, Branch YMA hruaitute leh veng mipui pawhin min ṭawiawm ṭha. Mipui thlawpna hi duhthusama ṭha niin ka hria a, an beisei ang ngeiin champion tumin theihtawp kan chhuah ang," tiin Vanglaini a hrilh.

ITI Veng hian Bengaluru FC forward Edmund Lalrindika an nei a, AIFF Elite Academy captain hlui Edmund hi an chakna hnar a ni. Mual sir aṭanga nawr turin Joseph Lalvenhima an nei a, Chennaiyin reserve team tana khel Joseph-a tlan chakna leh thiamna hi Chanmari meuh pawhin an chelh lo!

Durtlang coach K. Vanlalruata chuan, "Hma khaw sang aṭangin defender hi kan nei ṭhin a, tunah pawh Chungnunga leh Valpuia te kan nei a, ITI Veng tlarhma dang tur hian kan ringtawk khawp mai. Ṭantu pawh kan nei ṭha a, a nei ṭha ber kan ni hial ang," tiin Vanglaini a hrilh a, a vannei zawk an chak tur thu a sawi tel nghal bawk.

Coach Ruata hi Mizo cricket legend tia sawi theih a nih bakah Tlangthansanga, Lalhruaitluanga leh Lalrimawia te ho nen Durtlang bang rinawm tia sawi a ni ṭhin. Tun hma Durtlang defender-te ang thoin Lalchungnunga leh Hmingthanmawia (Valpuia) te hi an chak hle.

Durtlang hian ISL player Ricky Lallawmawma leh Isaac Vanmalsawma te bakah tualchhung player lar Jessy Vanlalmuana leh Lalliansanga (Notea) te an kawl. Chutihrualin Durtlang tlarhmate hi tun inelnaah an ke a la hmui tawk lo.

Final tenau

Final ṭawngkam sawi nan chuan a la hma deuh mah mah maithei a, chutihrualin Bawngkawn leh Republic Veng inkhel tur erawh final atan pawhin a itawm hle. Bawngkawn coach K. Malsawmkima chuan, "Veng leh veng inelnaah hian nomawi ka la chawi ngai lo a, champion hi a châkawm. Tun hi kan tan hun ṭha a ni a, champion thei tur pawhin kan ṭha tawkin ka hria," tiin Vanglaini a hrilh.

Bawngkawn hian MPL best forward MC Malsawmzuala, ISL club Odisha FC-a hmun pawimawh chang pha Isak Vanlalruatfela, MFA Cup best player Zonunmawia (AIFF Elite Academy chhuak), Sreenidi Deccan midfielder Lalromawia, Santosh Trophy-a Karnataka champion puitu Lalremtluanga Fanai bakah tualchhunga hming langsar ni pha MS Dawngliana, H. Lalmuankima, Augustine Lalrochana leh Ronald Zothanzama te an awm. Uan pui tham squad ṭha an nei a, Bawngkawn mipui pawhin an ṭawiawm ṭha ang.

Republic Veng pawhin player ṭha an kawl ve tho. Tlarhnungah Aizawl FC defender Lalmuanawma (Munez) leh Lalchhawnkima te an inkawp thei a, Chhinga Veng FC goalkeeper RS Lallawmzuala bakah Latluangliana leh Lalrawngbawla te an awm. Defence pui turin FC Venghnuai defensive midfielder Lalruatfela (RF-a) a awm a, tun inelnaah goal an la chhuah lo.

Republic Veng manager Vanlalhuma chuan, "Team inlungrualna a ṭha a, veng mipuiin min thlawp bawk. Pathian hnenah engkim kan dil a, ka duhna te kan tihhlawhtlin theih nan kan thawkrim hle. Tun ṭuma kan jersey set hnih hi kan Branch YMA hruaitu hlui Pu R. Vanlalsawma leh Branch Secretary ni rei ber Pu Mamawia te nu leh pa hriatrengna a ni a, kan hruaitu hluite puala hlawhtlinna chan ngei kan tum a ni," tiin Vanglaini a hrilh.

Tun hma aṭangin Republic Vengin ṭantu an nei ṭha ṭhin a, tun ṭumah pawh hian ṭantu an nei ṭha dawn. Bawngkawn lamin ṭantu an nei ṭha dawn bawk a, tla ni nema khelh tur ni mah se khelmual chhung leh pawn boruak erawh a 'hot' khawp ang.