RG Stadium-ah match thum

LBS Suzuki 21st Inter Branch YMA Football Tournament last 16 chu vawiin hian khelh chhunzawm a ni lehnghal dawn a, RG Stadium-ah match thum khelh a ni dawn.

Chawhma dar 10:30-ah MPL club nei Venghnuai leh Darlung te an inkhel dawn. Chhun dar 12:30-ah Armed Veng hnehtu Tlangnuam leh YMA Mission Veng te an inkhel ang a, chawhnu dar 2:30-ah Thingsulthliah Jt leh Khawzawl Vengthar te an inkhel zui ang.

Venghnuaiin MPL club an neih an chhawr a, team ṭha an ni tih lantir nan last 32-ah pawh Lengpui Model chu 5-0 in an la sawp. Darlung lakah pawh Venghnuai hi buk rit zawk tura ngaih an ni a, chutihrualin Dawrlung hi India junior team tan pawha khel tawh F. Lalrohlua te khua a ni.

Tlangnuam hian Armed Veng an hneh kha player neih dan hre lo tan chuan thilmak a tling a, chutihrualin tun ṭuma an squad thlir chuan a mak hran lo. CVL Remtluanga, S. Lalhrezuala leh Vincent Lalduhawma te an nei a, YMA Mission Veng lakah chak tura rinkai zawk an ni ang. YMA Mission Veng hian an beisei aia thui an thlen a rinawm a, chutihrualin Ramfangzauva telna team hian an zinkawng hi tihtawp mai an la duh lo ang.

Khawzawl Vengthar hi Aizawl defender hlui Lalṭhakima'n a ho thei a, Thingsulthliah Jt aiin an ṭha zawk. Chutihrualin tun hnaiah Thingsulthliahin nasa takin hma an sawn a, Khawzawl Vengthar tan zuam ngawt a rem lo ang.