Final-ah Zotlang Vs Melbuk

Upa C. Keikhuma Memorial Inter Village Football Tournament semifinal chu nimin khan Chhangphut Field-ah khelh a ni a, Zotlang leh Melbuk ten final an lut. June 3, Inrinni hian nomawi inchuhna hi neih a ni ang.

Zotlang hian final lut turin tun hmaa an la hneh ngai loh Kanan chu 2-1 in an hneh a, an hneh hi All Mizoram Inter Village Football Tournament 2023-a champion an nih avangin an hlawhtlinna hi a ropui zual. An lawmna belhchhah turin final an vawi khat thlenna a ni bawk.

Kanan hian goal khung hmasain an goal lawm nan an lam a, Zotlang an chak leh tak si avangin inkhelh banah coach Ramnunsanga (Dinthar FC defender hlui) enkawl team hi uar zetin an lam ta zawk.

Champion lai Melbukin Vengthar A hneh turin harsatna an tawk lo a, 4-0 ngawtin an chak. Vanneih ṭum ni se, Melbuk hi goal tam zawk khung thei an ni. Melbuk hi Lalrintluanga (Saitea) enkawl a ni a, nikum khan Lalsangzuala Hmar hoin an champion a, tun ṭumah hian Saitea hoin nomawi chawi nawn an tum hle.