Football Thiam Veng/khua 16

CYMA Football 2023-ah team 16 chauh an dam tawh. Aizawl khaw chhung team pakua leh Aizawl khaw pawn team pasarih an la dam. Boruak nei lian ber Sialhawk chu Aizawl aṭanga hla ber an ni.

Sialhawk hian 'social media' kaltlangin boruak an siam thiam a, All Mizoram Inter Village Football 2023-ah final hial thlengin an khawtual ṭawng 'Unzi Lassi' tihte chu Mizoram pum huapin a lar tawh.

Census 2011 aṭanga thlir chuan Sialhawk hi chhungkaw 430 awmna khua a ni a, football hmanga hming rawn chher lehzualin khelmuala an hlawhtlinna hmang hian an thlai thar 'lakhuihthei' te thlengin an hralh theih phah. Neutral fan zingah Sialhawk ṭantu an ṭhahnem viau bawk.

Khawzawl Vengthar hi Aizawl aṭangin 144.5 km-a hla a ni a, football thiam khua an ni. Tun hma aṭangin Khawzawlin player ṭha an nei tawh ṭhin a, Tata Football Academy-a best cadet ni thei Robert Lalthlamuana pawh Khawzawl khua a ni.

Thenzawl hi Aizawl aṭangin 90.9 km a ni a, kawng a ṭhat avangin a hla hran lo. Aizawl nula leh tlangvalten lehlangin Thenzawlah an inti hlim fo a, chutiang bawkin Thenzawl tlangvalte hi Aizawlah an tlangnel. Tun ṭumah hian Thenzawl Joint YMA anga tel an ni bawk a, a tikimtu satliah an ni lo.

CYMA Football last 16-ah Darlung an rawn lang hlawl a, mi tam zawk beisei loh a ni ngei ang. Darlung hi Mamit District-a awm niin 2011 census-a a lan dan chuan in 164 khua a ni a, mi 902 awmna a ni. Aizawl aṭangin 57.6 km chauh a ni bawk.

Aizawl chhehvela awm Lengpui leh Hualngohmun te last 16-ah an tel a, an pahnih hian seeded an nih phak ve ve avangin thilmak pawh a ni lo. Lengpui hi Aizawl khaw pawn aṭanga champion thei awmchhun an ni a, champion nomawi hawn tumin an thawkrim hle. Hualngohmun hian tun hnaiah nasa takin hma an sawn a, Lengpui ang thoin champion an beisei ngam a ni.