Europa League roreltu chu Sevilla

Sevilla FC chuan AS Roma hnehin a vawi sarih nan Europa League nomawi an chawi. Spanish club hian 1-1 a an inhnehtawk hnuah penalty shootout hmanga chak zawk zawnnaah 4-1 in hnehna an chang.

Argentina tana World Cup final-a chakna penalty khungtu Gonzalo Montiel chuan goal hnuhnung ber a khung. Sevilla goalkeeper Yassine Bounou chuan Roger Ibanez leh Gianluca Mancini te pet a dansak a ni.

Goal khat ve ve

Puskas Arena, Budapest-a nomawi inchuhah AS Roma chu a chefuh hmasa an ni. Jose Mourinho-a'n hliam damkawr Paulo Dybala chu bul a ṭantir a, thutlukna a siam sual lo. Argentine forward hian minute 35-naah Mancini hnen aṭanga a ball hmuh chu a khung.

Mourinho naute hian semifinal-ah khan Bayer Leverkusen lakah an goal khat neih an hum tluan thei a, anmahni goal ber an venhim theih avangin an tlang. Sevilla lakah goal an nei hmasa leh a, an venghim leh thei mai tura ngaih a ni.

Second half tir lamah Sevilla an vannei, mual sir aṭanga captain Jesus Navas-a cross chu Mancini chuan anmahni lamah a dang pial lut a, an inhnaihchilh em avangin keeper Rui Patrício tan dan hman a ni tawh lo.

Roma tan Tammy Abraham leh Ibanez ten hun ṭha bik an neih an hlah, hnai tak aṭangin Andrea Belotti pawhin Lorenzo Pellegrini-a ball kal chu goal chhungah a khung thei bik lo - inkhel boruak a nung hle.

Ibanez-a'n a tihtluk vangin Lucas Ocampos chuan penalty hlawh chhuakah a inngai, chakna goal khung theihna remchang hmuah inngai mah se English referee Anthony Taylor chuan VAR a hman hnuah penalty hi an hnuhkirsak.

Extra time khelh niin Roma bawkin remchang an nei, defender Chris Smalling chuan hun tawp hma minute 11 chauh awm tawhah goal kham a tauh per, goal dang a luh belh miau loh avangin penalty shootout hmangin chak an zawng - Sevilla an chak zui.

Sevilla nge nge

Europa League final hi khelh a nih hmain khawthlang chanchinbu mite chuan 'The Specialists' leh 'The Special One' inbeihna tiin an sawi. Sevilla hi Europa League bikah chuan team ṭha danglam an ni a, an khingpui tur Mourinho hi manager maksak tak a ni ve bawk.

Tun season chhungin Sevilla hian coach pathum an nei hman, an coach ni lai Jose Luis Mendilibar-a'n a club enkawl zahawmna leh ropuina a humhim thei a, nomawi an chawina kalkawngah hian Manchester United leh Juventus te an hneh bawk avangin a hnathawh hi sawi nep chi a ni lo.

Sevilla goalkeeper Yassine Bounou-a'n penalty vawi hnih a dansak. Mancini pet chu a ke lamin a dang a, a hnuhnung zawkah Ibanez pet chu lo khawihsak lehin goal ban a per phah. Morocco international hi an champion theih chhan pawimawh a ni.

Mourinho-a'n penalty an pet hmain player tawnhriat nei ṭha, a bik takin penalty pet thiam Lorenzo Pellegrini, Dybala leh Abraham te a la chhuak hman tawh. Penalty an pet dawn tih hre lawk se la chuan Portuguese manager thutlukna hi a danglamin a rinawm.

Nomawi inchuhna inkhel a ni bawk a, boruak a nung hle. Yellow card vawi 13 ngawt phawrh a ni - Europa League inkhel pakhata card phawrh hnem ber ṭum a ni. Roma player pasarih ngawtin card an hmuh chu record thar a ni nghal bawk.

Yellow card hmu zinga pathum chu substitute bench lama ṭhu an ni a, khelmual chhung mai bakah a pawn lamah an boruak a sang hle. First half chawlh dawn, minute 90 zawh dawn leh extra time chawlh dawn vawi hniha injury time an pek zawng zawng chu minute 25 a chuang hial!