Europa League chu Sevilla ta

Inkhel ṭan hmain Sevilla ṭantute chu "Europa League hi kan ta a ni" tiin an au rual a, inkhelh tawpah pawh an hla ngai bawk hi an champion lawm nan an sa chhunzawm thei - European football inelna sang pahnihnaah hian an champion hnem ber.

Season danga an champion aiin kumina an champion dan hi a hlu zual deuh mai thei. La Liga lamah an talbuai a, tlak hlauhawm zinga mi an nih avangin manager pawh an siksawi. March thla laihawl khan Jose Luis Mendilibar hi an ruai chiah.

Kum 62 mi Mendilibar hian La Liga-ah a team chu dinhmun hima a dah bakah, Europa League bikah phei chuan match ruk chauh kaihruai hman mah se an champion der - club nena an inremna hi tun season tawp thleng daih a ni.

Mendilibar chuan, "Tunah chuan ka hma hun sawi a remchang rih lo, kan champion avanga lawm hun a ni. Player leh coach zawng zawng hian European football khelh an duh, chumi a hlawhtling thei phei chu thil lawmawm bik a tling.

"He hmunah hian ka hlim, nomawi kan chawi piah lamah hian hun harsa kan tawh lai taka hruai chhuak theitu ka ni hi ka lawm," a ti. Sevilla sporting director Monchi pawhin coach hma hun sawi ai chuan champion lawm phawt an duh tih a sawi ve bawk.