Silver medal duh lo Mourinho

Jose Mourinho-a'n tun hmain European football-ah hian final vawi nga a lut a, a team enkawl a champion pui vek. Sevilla lakah erawh AS Roma a champion pui zo lo, a record ṭha leh duhawm tak chu a tawp.

Pahnihna an nih avangin silver medal a dawn a ngai. Lawmman an sem zo a, medal a lak chu Mourinho hian inkhel entu naupang pakhat hnenah a pe daih. Portuguese manager chuan, "Ka duh thua thil ti ka ni, a chhan chu silver medal hi ka duh lo," a ti.

Season hmasa khan Mourinho kaihhruainain Roma hian Europa Conference League nomawi an chawi, kuminah a aia lian leh ropui zawk chawi tum mah se an thei rih lo - Mourinho hian season tharah club dang a enkawl mai ang em, tih chu zawhna lian tak a tling.

Kum 60 Mourinho chuan, "Ka hma hun hi thla tam vak lo liam taah khan ka sawi chiang tawh. Club dang nen inbiakna nei anga min sawi hi chu thu dik lo a ni, biak nei ni ila chuan Roma thuneitute ka hrilh ang, a lang loin thil ka ti ngai lo.

"Ka naute hian an theihtawp an chhuah a, chak lo zawk ni mah se Rome khawpuiah chuan an chanchin hian sawi zui a hlawh tho ang - a chhan chu club tan an theihna zawng zawng an hlan vang a ni. Thawnthu kan ziak a, kan chanchin hi a la tawp lo," tiin a sawi.