Zaninah PVL an khel ṭan dawn

Tualchhung volleyball inelna lian ber Tata SK 712 Pro Volleyball League chu zanin dar 8:00 hian R. Dengṭhuama Indoor Stadium, Mualpuiah khelh ṭan a ni dawn a, match hmasa berah nikum final-a intawng Durtlang North leh Thutak Nunpuitu Team an inhmachhawn ang.

Nikum PVL nomawi inchuhna inkhelah Durtlang North hian 25-20, 23-25, 25-21, 25-23 (3-1)-in TNT an hneh a, a vawi khat nan an champion. Muanna Veng team TNT erawhin nomawi an la chawi lo chhunzawm.

Durtlang North coach Lalchhuangliana chuan, "Inrintawkna nei turin kan inbuatsaihna a ṭha tawk a. Team tichak lehzual turin state pawn aṭangin player kan la lut thei bawk a, champion leh theih kan inbeisei hle a ni," a ti.

Karnataka state team captain ni lai Anup D Costa an la lut a, Ningani khan India team tana World Cup khel tawh 6ft 4in-a sang hian Aizawl lutin Durtlang North team a zawm fel nghal. Lalbiakmuana awm tawh lo mah se captain Fabian Lallunghnema, C. Zonunmawia, R. Vanlalmawia leh Vanlalṭanpuia te an la neih avangin an ṭha tawk hle.

TNT lam erawhin player langsar tak lakluh an nei hran lo, season hmasa lama an player pawimawh spiker Laldinchhunga leh setter Lalliankima an hmang thei dawn lo bawk. Tualchhung player hlanga khelh an tum bawk avangin hna a hautak dawn.

Vanlalṭanchhana bakah captain Vanlalchhantluanga Sailo leh hmasawn mek Zosangzuala te an la neih avang erawh chuan dah hniam chi an ni dawn lo. TNT coach Lalhmangaihsanga chuan, "Kuminah ṭha zawk, nghet zawk leh tlo zawk turin kan inbuatsaih a, Pathian rinchhan chungin champion thei tur khawpa kan khelh theih ngei kan ring a ni," a ti.