Djokovic leh Alcaraz ten third round an lut

French Open champion tura rinkai pahnih Novak Djokovic leh Carlos Alcaraz te chuan hma lam an pan zel. Nilaini zan khan an khingpui ve ve hnehin Roland Garros third round an inhlangkai.

Djokovic-a'n fiahna hautak a hmachhawn, set khatna lek pawh darkar khat leh a chanve deuhthaw an khel a, mahse Serbian star hi harh chhuakin Marton Fucsovic chu 7-6(2), 6-0, 6-3 in a hneh.

World number 3 hian a service a chhawr ṭangkai leh ta viau, set khatna rei fal hle mah se inkhel pumpui hi darkar hnih leh minute 44 chhungin a zo hman tho a, bul ṭan fuh tawk lo mah se a hmawr bawk dan a fuh.

Kum 36 mi Djokovic chuan, "Marton Fucsovics-a khelh dan khan min barakhaih hran lo, a chhan chu theihna nei sang tak a ni tih ka hre lawk. Set khatna hautak zeta kan khelh hnuah ka game pangngai ka khel zui thei kha ka vanneih phah," tiin a sawi.

Philippe Chatrier-a light chhit eng hnuaiah Djokovic hian inkhelh nuam a tih thu a sawi bawk. Serbian star hian a match lehpekah chuan Spanish tlangval Alejandro Davidovich Fokina a tum dawn - a chak zel a nih chuan semifinal-ah Alcaraz nen an intum thei dawn.

Inkhel dangah world number 1 Alcaraz chuan Taro Daniel 6-1, 3-6, 6-1, 6-2 in a hneh. Daniel hi world number 112 a ni a, inelna lian Grand Slam bikah Alcaraz hian world ranking 100 aia hniam lam a tum tawh a la hneh vek.

Seeded pakhatna Alcaraz chuan, "Paris khawpuia inkhelh hi chu a nuam, match hmasa ber aṭang khan thlawpna ka dawng ṭha hle. Roland-Garros hi chuan zun a nei a, chumiah chuan mi tam tak an uai, kei ngei pawhin ka tem ve ṭan," a ti. Denis Shapovalov nen an intum leh dawn.

Stefanos Tsitsipas pawh a chak. Greek tlangval hian Court Suzanne-Lenglen-ah world number 57 Roberto Carballes Baena chu 6-3, 7-6(4), 6-2 in a hneh. Zanin hian Diego Schwartzman nen an inhmachhawn leh dawn, inkhel a hmuhnawm ang.

Seeded pasarihna Andrey Rublev pawhin a vawi khat nana Grand Slam nomawi chawi a la tum zel, tualchhung tlangval Corentin Moutet chu 6-4, 6-2, 3-6, 6-3 in a hneh. Seeded 19-na Roberto Bautista Agut erawh Juan Pablo Varillas lakah 1-6, 4-6, 6-3, 6-1, 6-1 in a chak lo.

Kumin French Open-ah hian champion lai leh vawi 14 champion tawh ni bawk Rafael Nadal chu hliam vangin a inlan ve thei lo. Spanish star hi a chawlh chen tur hriat a la ni lo - season tharah tennis chawlhsan a rilruk thu pawh a lo

sawi tawh.