Mizoram Muaythai team an hlawhtling

National Muaythai Championship 2023-ah Mizoram chuan gold medal 1 leh silver medal 4 dawngin an hlawhtling thawkhat hle. World Championship bronze medalist Lalngaihawma, Hunthar chuan Mizoram tana gold medal awmchhun a dawng.

Chennai, Tamil Nadu-a inelna neihah hian Mizoram aṭangin player panga an tel a, kal zawng zawng ten medal an dawng vek a. Lalngaihawma hi -51kg Senior-ah pool A champion a nih hnuin pool B champion Manipur player nen champion nih an inchuh a, hnehna changin gold medal a dawng ta a ni.

George Lalmuanawma, Chawnpui chuan -60kg Senior final-ah a khingpui Assam player a hneh lo a, silver medal a la. Rony Lalchhuansanga, Kolasib College Veng chuan -54kg Senior final-ah Rajasthan player hneh loin silver medal a dawng bawk. Lalrinhlua, Kolasib College Veng chuan -57 kg Senior final-ah Manipur player hneh loin, Lalruathlua, Luangmual chuan -67kg Junior final-ah Kerala player hneh loin silver medal a dawng bawk.

National Muaythai championship-ah hian a pumpuiah Assam chu team champion an ni a, Kerala pahnihna niin Manipur chu pathumna an ni bawk. Muaythai Association president Brian Lalnunhlima chuan an duh ang thlap ni lo mah se an lawm tih a sawi a, hmasawn an ngaih thu a sawi bawk a ni.

Mizoram team hian nimin khan Chennai chhuahsanin Mizoram an rawn pan. July thla hian Mizoram pum bakah state pawn pawh an tel theihna LPS Pro Muaythai Championship chu buatsaih leh a ni ang.