Barcelona-ah Messi a kir dawn lo

La Liga champion Barcelona president Joan Laporta-a'n Lionel Messi an lak let tur thu vawi tam sawi mah se a thusawi dikna hmuh tur a awm lo a, an tih theih zawng zawng ti angin lang mah se, Barca hian Messi hruai kir tumna an nei lo niin a lang.

Spanish football expert Guillem Balague chuan Messi hi Barca-ah a kir loh tur thu a tarlang a, Argentina captain aiawhte chuan Barca hi biain, sawmna pangngai engmah an la dawn loh avangin Messi hian khawdang a hawisan tur thu an hrilh.

World Cup 2022-a Argentina champion puitu Messi hian nipuiah Paris St-Germain a chhuahsan tawh dawn a, Barcelona, Major League Soccer club Inter Miami leh Saudi Arabia club Al Hilal te chu Messi duhtu anga media-in an tarlan langsar zual an ni.

Kum 35 mi Messi hian thutlukna a siam dawn hnai tih a aiawhte chuan an sawi a, khawthlang media titi aṭanga a lan dan chuan Argentine forward hian Saudi Arabia lam a pan ngei dawn niin a lang.

Lemchang Barca

Barca president Laporta chuan May thlatir khan Catalan club chu Messi tan chuan a 'in' a nih thu a sawi a, "PSG player a nih avangin season zawh hun kan nghah phawt a ngai a, nakinah hahdam zawkin kan la sawi thei ang chu. Saudi Arabia hi ka zah viau a, mahse, Barca chu Barca kan ni a, Messi tan chuan a in a ni," a ti.

Mahse, Balague chuan Barca hian an hmai bal phih fai nan Messi lak kir tum angin lem an chang niah a ngai a, Catalan club tan match 778-a goal 672 leh assist 303 nei thei hi Barca-in an dawr lo niin a sawi.

Balague chuan, "Barcelona media-te chu Messi lakkir tum ang taka lang a, thawnthu phuah tura chher hriam an ni. An tum dan takah chuan anni chu Messi lakluh tum tak anga lan a, Messi leh La Liga chu thiam lo anga lantir an tum a ni," a ti piap mai!

Tarlan tawh fo angin Catalan club hi sum leh paiah an talbuai takzet a, an sum dinhmun hi tun thlengin an la siamrem lo. Financial Fair Play (FFP) dan aṭanga teh pawhin Barca tan Messi hruai kir ngaihna a la awm lo.

Thawnthu dang

Barcelona manager Xavi chuan Nou Camp-a Messi kir leh kir loh chu, "Messi kutah 99% a awm tawh," tiin a sawi a, mahse, Messi nena khel dun ṭhin coach hian dawt a sawi lam ai mahin, hrilh a nih angin thu a sawi niin a lang.

Catalan club hian Messi hruai kir turin sum leh pai an nei lo a, thuneihna sang tak neitu Messi hruai 'haw' hi an châk lo, tih sawi ngam se, fans-in an pawm zawkin a rinawm - mahse, hruai kir tum ang taka lan a, a tawpa player leh La Liga thiam loh anga lantir an tum.

Club tinin an player duhzawngte an melh ṭan a, chhuahtir tur chhuahtirin, an chelh duh an chelh ṭan a, mahse, Barca erawh Messi lak tum ang taka langin, lak tum tak tak si loin an awm.

A tawi zawnga sawi chuan, miin team an din mek laiin Catalan club hian lem an la chang kual vel mek a, fan-ten league champion an lawm zanah meuh pawh Messi hming an lam avangin an hmai bal phih fai an tum a ni ber!

Messi inpekna

Laporta vek hian, "Kan thawnthute hian kan lam an ṭang a, Messi chuan he club hi a thinlung a pe a, khawvel hmun hrang hrangah fans maktaduai 400 chuang kan nei bawk," tiin a lo sawi tawh a, sum ngah tawk lo mah se Messi chuan an thawnthu leh sulhnu avanga kir a hreh a rin loh thu a sawi.

Hei mai a ni lo - Messi nen ṭha taka an inbiak thu leh, World Cup 2022-a Argentina a champion pui khan lawmpuina thu a thawn thu thlengin a sawi a, a tak ramah erawh an indawr si lo!

Messi hian Barca-a kir hi a châk reng a, pathian ang maia entu fan-te nena hun hlimawm tak hman leh a duh. Messi team-te hian Barca-in FFP dan an zawm theihna a nih phawt chuan Argentine forward hian hlawh tlem tak hlawh pawh a pawi ti lo a, a thlawna khelh pawh a hnial lo tih thlengin Barca hi an hrilh.

Mahse, thuneitu lamin Messi thiltihtheihna an hrechiang a, an hnena a kir chuan, a duh phawt chuan an lakah fans pawh a heltir thei hial ang, tih hi an hrechiang ve tlat - khawvela footballer ṭha ber anga tam takin an ngaih hi hruai haw an châk lo a ni!

Messi leh thawnthu

Kum 35 mi Messi hian Barca tan kum 21 khelin, La Liga (10), Copa del Rey (7), Spanish Super Cup (7), Champions League (4), UEFA Super Cup (3) leh FIFA Club World Cup (3) ah te champion nomawi a chawipui.

Barca chanchin mai ni lo, football khawvel chanchinah ani aia ṭha awm lo ang hialin tam takin an ngai - La Liga ngei pawhin an league-a Messi kawl hi an league tan a ṭha tih an hai lo.

Mahse, Barca chuan La Liga hi an club doah an puh a, sum leh pai thununna thlengin anmahni huat vangah an ngai. A nihna takah erawh La Liga-in an league club-te sum leh pai hman dan a thunun hi club tluchhe tur venna ṭha tak a ni zawk.

Barca hian season hmasa khan 'economic lever' an tih chu chhawr ṭangkaiin, vawi thum ngawt an hmang a, hei hian club chu duh ang taka club share hralh ṭhen turin zalenna a pe - mahse, tun season-ah hei hi hman nawn theih a ni tawh lo.

A tak ram

Barca hian tun hnaiah, club thil neihte tiral a, suma an chantir theih ang chi hralh tura ruahmanna an neihte La Liga hnenah an thehlut - hei hi budget ruahman pangngai piahlamah, sumah an talbuai dawn lo, tih lantir nana La Liga lama thehluh ngai a ni.

Heng zawng zawng thehluh chhan langsar pakhat chu, ruahmannaa tel sa ni lo sum lakluh an neih chuan club talbuai phah nana an hman loh nana venna a ni tel bawk - La Liga hian a club te hi a veng uluk hle.

Club director tam takin, sum an hmuh belhin club bungrua leh mamawh thawm ṭhat a, ba rulhna lama hman aiin player lei nana hman an ching a, hei hi La Liga chuan ven a duh tel bawk.

A nihna takah chuan tun hnaia Barca tlakchhiat chhan langsar pawh hei chiah hi a ni - an ba tam tak ngaihsak loin, man to uchuakin player an lei nasa a, hlawh an pe hnem a, a tawpah a tuartu chu club a ni.

Engtin zel?

Club-ten budget plan an pharhah hian an sum lakluh zat aṭanga an hman tur zawng zawng (infiamna kaihhnawih loa sum hman tur, leiba rulh tur) paihin, a bak la bang zawng chu player-te hlawh tur a ni. Tun dinhmunah chuan Barca hian pawisa bang an neih zawng hi Messi hnena pek an duh leh duh loh chu thutlukna tur a ni.

Mahse, Barca hian chu chu an duh lo niin a lang a, Ronald Araujo emaw Gavi emaw hnena contract thar pek chu an thupui hmasa zawk - a nihna takah chuan Barca hian leiba an la ngah em em a, sum hman tur an la nei mang bar lo.

La Liga chuan Barca hi an sum hman theih chin dik tak leh an sum dinhmun hi an hrilh hnai - Barca hian hei erawh an hrechiang sa a, transfer tibuai lo tura tlangzarh rih loh chu an duh ber zawk a ni.

Hetihlai hian Catalan media ṭhenkhatah chuan, La Liga leh Barcelona hotute inhmuin, Messi lalut tura buaina la awm chu euro maktaduai 40 chauh ni tawhin an sawi - mahse, hei erawh thuthang dik lo a ni.

A tawpah chuan...

Barca-in La Liga nomawi an chawi a, theihnghilh thiang lo erawh Champions League-a beisei an phak lohzia a ni. Hetihlai hian Messi boruak leng vel chu pa pakhatin bihruk nan a hmang a, a hming chu club president Joan Laporta a ni.

Laporta luh hnuah Barca leibate beisei angin a la kiam lo a, Europe-a team liante el tak tak turin sum hman tur an nei tawh lo - he Catalan team hian insiamṭhat an duh chuan lemchan bansan a, a tak ram an hmachhawn a ṭul.

Messi erawhin Al-Hilal a pan ngei dawn niin a lang a, Saudi club hian season khatah pound maktaduai 350 hlawhtir an inhuam miau avangin Argentina captain tan heti zat sum hnar hi a har ang.

Ballon d'Or vawi sarih dawngtu Messi thutlukna hi a club tharin an puang ang - 'Khawvela footballer hlawh hnem ber Messi' tiin a chanchin i hre ṭep e.