Dalot-a'n United-ah contract thar a ziak

Manchester United full back Diogo Dalot chuan Old Trafford-ah kum nga chhung atan contract thar a ziak a, June 2028 thleng Red Devils tan a khelh chhunzawm ang - a contract hi a ṭul dan a zira kum khat dang pawhsei theih tura dah a ni.

Kum 24 mi Dalot hian kum 2018 khan FC Porto aṭangin Old Trafford hi a pan a, match 107 khelhsaka goal thum khungin, assist vawi ruk a nei bawk.

Dalot chuan, "Player-tin ten zinkawng duhawm tak kan zawh ṭan mekah kan ngai a, FA Cup final khelh turah kan rilru zawng zawng kan pe mek a ni," a ti.

League Cup champion Manchester United hian season tharah Champions League an khel dawn a, June 3 zan hian Manchester City nen FA Cup champion nih an inchuh dawn bawk.

Dalot chuan, "Manchester United tana khelh phak hi football-a chawimawina sang ber zinga mi a ni. Tun hnai kum nga chhungin hun duhawm tak tak kan hmang a, a mimal pawhin hma ka sawn hle.

"United ka zawm aṭanga vawiin thleng hian, he club ka ngainatna hi a pung tial tial a ni. He team-in a tum ramte thleng a, fans pawhin he team hi an chhuan em em theih nan theihtawp ka chhuah zel dawn, tih ka tiam duh che u a ni," a ti.

Dalot hian a contract pangngai ang chuan tun season tawp thleng contract neiin, a ṭul dan a zira kum khat pawhsei theih a ni. December khan United chuan a contract hi pawtseiin, tunah a thar hlakin an ziahpui leh ta a ni.

United's football director John Murtough chuan, "Diogo hi defender ṭha tak, tlan chak, tharum ngah leh theihna ngah tak a ni. Kum 2018-a club a zawm hnuah khan a kum telin hma a sawn a ni," an ti a, contract thar an ziahpui thei chu a lawm hle.