Everton-in Conor Coady an duh lo

Premier League club Everton chuan Wolverhampton Wanderers aṭanga loan-a an hawh mek Conor Coady chu pound maktaduai 4.5-a a ngheta lakluh theihna dan nei mah se, a ngheta contract ziahpui loh zawk an thlang.

Kum 30 mi defender hian Everton tan tun season inelna hrang hrangah match 25 khelin goal hnih a khung a, assist vawi khat a nei.

Premier League-a an him leh him lohna tur inkhel, an match hnuhnung berah pawh Bournemouth lakah bul a ṭan a, mahse, Merseyside club hian a ngheta lalut lo turin thutlukna an siam.

Liverpool aṭanga inzir chhuak Coady hi Everton boss Sean Dyche hnuaiah a tla tlum lutuk lo a, English coach enkawlna hnuaia league match 18 aṭangin match ruk chiah a khel phak - season ṭan dawn khan rin loh takin Everton hi a zawm a, a hma season chiahah Wolves tan league match 38 a khel kim vek.

Everton hian Sporting Lisbon aṭanga loan-a an hawh defender Ruben Vinagre pawh an kir tir dawn a, Wolves tan pawha lo khel tawh Vinagre hian season khat chhungin Everton tan match khat chiah a khel hman.

Everton director of football Kevin Thelwell chuan, "Kan club an cham chhunga, khelmual chhung leh pawna an nungchang leh tha thawh hlu tak avangin Conor leh Ruben te chungah hian kan lawm hle. An kal zelna turah duhsakna kan hlan e," tiin an player pahnihte a thlah.