Ashley Young-a'n Aston Villa a chhuahsan

Aston Villa full back Ashley Young chuan Villa Park a chhuahsan dawn a, season hman zawh takah khan inelna hrang hrangah match 32 khelin goal khat a khung.

Villa hian season hman zawh takah khan Premier League-a pasarihna ni chungin season an khar a, Europa Conference League khel turin an inpetkai - Young erawh a chhuak dawn.

Kum 37 mi right back hian kum 2021 khan a vawi hnih nan Villa hi a zawm a, kum khat chhung atan contract a ziak - kum khat dang pawhsei a ni a, season hnih chhungin match 57 a khelhsak hman.

England tan vawi 39 inlana goal sarih khungtu Young hian Watford aṭanga a professional career ṭanin, kum 2007 khan Aston Villa hi a vawi khat nan a zawm. Hetihlai hian wing-ah khelin, match 190-ah goal 38 a khungsak.

Season nga a khelh hnuah kum 2011 khan Manchester United zawmin, Old Trafford-ah hian full back angin an chhawr zui a, a career chawhnu lamah full back-in hun a hmang tam ta zawk.

January 2020 khan United chhuahsanin Inter Milan a pan a, Serie A club tan match 59 khela goal nga khungin, assist vawi riat a nei a, 2020-21 season khan Serie A nomawi a chawipui.

PFA Young Player of the Year (2008-09) ni thei Young hian United-ah Premier League, FA Cup, League Cup, Community Shield leh Europa League nomawi pakhat ṭheuh a chawi hman a, a career tawp lamah sum tamna lam a thlir a nih pawhin a demawm lo ang.