Inthlak danglam kan mamawh - Leeds Chairman

Premier League aṭanga tla hlim Leeds United chairman Andrea Radrizzani chuan inthlak danglam an mamawh thu sawiin, fan-te duh an thlen theih loh avangin ngaihdam a dil bawk.

Leeds United hian an league match hnuhnung berah Tottenham Hotspur chu 4-1 in an ngam lo a, he inkhelah hian fan-te chu club-a share ngah ber leh Chairman ni bawk Radrizzani chu chhuak turin an au a ni.

Mahse, Radrizzani chuan, "He zinkawng zawh ho zel tur hian kan rilru zawng zawng kan pe a, kan inpeih a ni. Season kan khar dan kha pawi ka ti a, kan inhamtan hram theih nan pawh sum pawh kan seng hle.

"Mahse, kan thawhrim luatah tihsual pawh kan nei ve bawk a ni. Kan tihsual aṭanga inzir ngei tumin kan thutlukna tam tak pawh kan en let a ni," a ti.

Radrizzani chuan, "Thil intiam vak ka duh hran lo. Hnathawh tur tam tak a la awm a, inthlak danglam kan mamawh. He club tana kan thil tumte tihlawhtling turin ruahmanna fel tak neih a ngai a, chumi tur chuan hna kan thawk mek," a ti a, club inrelbawlnaah mi thar an awm nual tur thu a sawi bawk.

Leeds hi director of football Victor Orta chuan tun thlatir khan inhriatthiam tawnnain a chhuahsan tawh a, season tawp thleng atana an lak coach Sam Allardyce hi an la ruai chhunzawm zel dawn em, a la hriat rih loh.

Radrizzani hi Serie A aṭanga tla hlim Sampdoria leitu zingah a tel a, hemi a nih avang hian Leeds hi a hralh mai ang em, tih zawhna a awm hman a, tuna a ṭawngkam aṭanga teh chuan chhuahsan tumna a nei lo, niin a lang.

American football team San Francisco 49ers neitute chuan Leeds-ah hian 44% neiin, Leeds-a Radrizzani share zawng lei an inhuam nia sawi a ni - Premier League aṭanga an tlak miau avangin an hlutna hi a hniam leh sawt ang.

Radrizzani hian kum 2017 khan pound maktaduai 45-in Leeds hi a lei a, Marcelo Bielsa lalutin, Argentine coach hnuaiah hian kum thum hnuah Championship title an chawi a, Premier League an inpetkai - tunah erawh Championship bawk an khel leh dawn ta.