Bawngkawn leh Durtlang an dingchang

1st Bn MAP Ground-ah beisei lawk ang ngeiin ennawn hmuhnawm chhuah a ni a, LBS Suzuki 21st Inter Branch YMA Football Tournament hlutna belhchhahin a awm. CYMA Football a hmuhnawm chho zel dawn.

Nimin inkhelah Durtlangin ITI Veng 3-2 in an hneh hram a, inkhel hnuhnung zawkah Bawngkawnin 3-2 thoin Republic Veng an hneh leh hram bawk. Team ṭha pali inkhelah ṭha bik pahnih Bawngkawn leh Durtlang an dingchang.

Durtlang an tlo

ITI Veng leh Durtlang inkhelah goal a lut hma. Minute lina lekah Edmund Lalrindika freekick pet chu Durtlang keeper-in dang mah se a per chu C. Vanlalhmangaihzuala'n a tauh goal.

Durtlangin goal chhuah mah se an talbuai phah lo. ITI Veng defender hand ball vangin Durtlangin penalty an hmu a, minute 30-naah Lalchungnunga'n penalty aṭangin siphurh a sut.

Durtlang tan an tlarhnung defender-te an pawimawh a, Chungnunga'n penalty aṭanga a khung hnuah a kawppui Hmingthanmawia'n (Valpuia) mual dinglam aṭanga freekick chu minute 44-naah a tlawh goal. First half-ah Durtlangin hma hruai mah se ITI Veng tan Edmund-a a hmuhnawm hle.

Second half-ah Durtlang bawkin goal an khung hmasa a, captain Ricky Lallawmawma ball pek chu Isaac Vanmalsawma'n tawih zetin minute 65-naah a khung.

Durtlang hian 3-1 in hma hruai mah se nuam sa takin an chak bik lo. ITI Veng tan minute 87-naah Lalchhanchhuaha'n mawi zetin a tauh lut a, 3-2 a ni. Hun tawp lam boruak a sang a, coach K. Vanlalruata enkawl Durtlang an ṭangtluan thung.

Inkhelh banah Ruata chuan, "Inkhelh harsa tak a ni a, ka player-ten a hunah tak an theihna an lantir. Team ṭha inkhelah chuan vannei zawk an awm a ngai a, chak phu zawk leh vannei zawk kan ni," tiin Vanglaini a hrilh.

Bawngkawn an thiam

Final tenau ang hiala chhal Bawngkawn leh Republic Veng inkhelah K. Malsawmkima enkawl team-in bul an ṭan ṭha hle. Republic Vengin bul ṭan mah se ball an inpe kual sual a, Isak Vanlalruatfela'n ṭha zeta a lakluh hnuah box pawn aṭangin goal kilah tak a khung. Goal hi second 13-na leka lut a ni.

Republic Veng an insiamrem thei lo a, Bawngkawnin midfielder Lalromawia leh Zonunmawia te hmangin inkhel an thunun. Goal hmahruai khungtu Isak-a'n dinglam aṭangin Republic Veng tlarhnung a rum ṭhaih a, veilam aṭangin Augustine Lalrochana a hlauhawm viau bawk.

Minute 27-naah Republic Veng captain Lalmuanawma (Munez) a chesual a, a freekick pet sual chu MS Dawngliana zawnah kher tla fuhin Bawngkawn captain Dawngtea hian rilru fim takin a pet goal. Bawngkawn an hlim a, an hlimna belhchhah turin corner aṭanga ball kal chu Isaka-a'n fing taka khengin Dawngtea bawkin minute 39-naah an khung. Halftime-ah 3-0 a ni.

Republic Veng hun

Second half-ah Republic Vengin game plan an thlak a, mual sir aṭangin Lalrinzuala leh Lalnunzira te hmangin an nawr a, veteran striker Lalawmpuia an luhtir bawk. Republic Veng goal bawh a na hret a, Rinzuala penalty hmangin minute 66-naah siphurh an sut ṭhen.

Bawngkawn midfielder Vanlalremruata'n yellow card vawi hnihna hmuin hnawhchhuah a ni a, player 10-a an khelh avangin Republic Veng an phur sawt. Siphurh sut tumin Republic Vengin an nawr nat karah Isaka'n a ball thiamna leh tlan chakna hmangin chance ṭha ṭum hnih a insiam a, keeper RS Lallawmzuala zarah Republic Veng an him.

A tawp lamah erawh Republic Veng an vanduai a, substitute AwP-a goal khung chu referee-in a pawm lo. Replay thlir kirin foul a awm lo a, injury time-ah Zirtea'n ṭha zeta khalh lutin siphurh a sut ṭhen leh a, beiseina siamtu ni mah se a tlai ta mah mah. Chak phu zawk Bawngkawnin 3-2 in hnehna an chang.

Bawngkawn coach K. Malsawmkima chuan, "A harsa ngei mai. Yellow card hmasa zawk kha a pe hma mah mah a, red card kan hmu kha kan tuar. Player 10-a kan khelh hnu khan ka duh aiin kan tawm a, kan talbuai deuh a ni ber. Chutihrualin kan duh ber chu chak a ni a, team ṭha tak Republic Veng kan hneh avangin kan lawm hle, kan tum ram erawh kan thleng lo - kan duh chu champion a ni," tiin Vanglaini a hrilh.

Republic Veng assistant manager F. Zorinpuia chuan, "Kan goal khung loh kha chu pawm se, result a dang thei ang. Chutihrualin referee-te hi mihring ve bawk an ni a, tisual thei an ni. Ka player-te khelh danah ka lungawi a, huntawp thlengin theihtawp an chhuah. Kan hneh loh Bawngkawn te champion ngei turin duhsakna ka hlan," tiin Vanglaini a hrilh.

A thiam pariat zingah Tlangnuam

LBS Suzuki 21st Inter Branch YMA Football Tournament last 16, RG Stadium-a inkhelah Tlangnuamin quarterfinal lut turin harsatna an tawk lo a, Mission Veng chu 5-2 in an sawp.

Tlangnuam tan Vincent Lalduhawma chuan hattrick a siam a, player chhuanvawr C.V.L Remtluanga pawhin goal khat thawhin, Vincent Laltluangzela'n goal khat a thawh ve bawk.

RG Stadium-a inkhelah hian Tlangnuamin minute 13 chhungin goal hnih an khung hman a, Mission Veng tana Ramfangzauva leh K. Lalruatfela te goal khung chu mualpho khuhna goal chauh a ni - Tlangnuam hian quarterfinal-ah team ṭha Durtlang an hmachhawn zui dawn a, an theihna tak tak fiahin a awm ang.

MPL club nei thei Venghnuaiin quarterfinal em pawh lut loa CYMA football mangṭha an duh lo a, Darlung chu 2-1 a hnehin a thiam pariat zingah an invawrhkai.

Venghnuai tan RM Zothansanga chuan minute 26-na lekah goal hmahruai khungin, Darlung hian minute hnih hnu lawkah Lalthuthlungliana hmangin an si phurh an sut.

Mahse, hun tawp nan minute thum chauh a awm tawh tihah Venghnuai bawk kan hmu nawn a, T. Malsawmzuala'n chuan chakna goal a khung - Darlung tan si phurh sut turin hun a tam tawk tawh lo.

Khawzawl Vengtharin Thingsulthliah Jt. hmachhawnin, Lalfamkima goal hnih leh VL. Remruatfela goal hmangin hnehna an chang a, quarterfinal-ah Republic Veng hnehtu Bawngkawn an hmachhawn zui dawn - hmabak a hautak zel.