Big Sam-a'n Leeds United a chhuahsan ta

Leeds United boss Sam Allardyce chuan Premier League aṭanga Leeds a tlakpui hnuin a chhuahsan a, Big Sam-a'n Leeds a enkawl zel dawn e, tih zawhna chu a chhanna pekin kan awm ta.

Kum 68 mi coach hian league match li chiah khelh tur a awm tawh tihah Leeds hi a enkawl a, English top flight league-a a inhamtanpui theih chuan bonus atan pound maktaduai hnih chuang pek tiam a ni.

Mahse, team tla mai tur chhanchhuah kawnga hming chher tak coach hian mipui beisei ang result a pe thei lo a, season thum Premier League-a an cham hnuah Championship lamah an tla thla dawn.

Javi Gracia thlaka Leeds enkawltu Allardyce chuan, "Club ropui tak leh fans nei ṭha em em, Premier League-a cham reng phu tak Leeds United enkawl theih hi ka tan chuan chawimawina ropui tak a ni.

"Nakin hun thlir chunga hmachhawp thui tak nei club enkawl hi tun ang ka career-ah hian ka tan a fuh ang em, tih ka hrethiam lo a, mahse, he club hi an hma hun zel atan duhsakna sang ber ka hlan a ni. Premier League-ah an kir theih ka beiseipui em em bawk," a ti.

Leeds chief executive Angus Kinnear chuan, "Sam hian huaisen taka chona hmachhawn a, kan him theih nana a theihna zawng zawng a hlan avangin a chungah lawmthu kan sawi a ni.

"Mahse, vanduaithlak takin, kan inhamtang zo ta lo. Mahse, Sam hian a assistant Karl Robinson leh Robbie Keane te nen Thorp Arch (an training ground) leh Elland Road-a hlimna a thlen leh theih nan an theihna zawng zawng an hlan a, an chungah kan lawm takzet a ni," an ti.

Leeds chuan Coach thar an puan thuai tur thu an sawi a, season thara Championship khel tur club hi tuin nge enkawl ang, tih chu zawhna awm mek a ni.

Big Sam hian Leeds hi Manchester City (2-1), Newcastle United (2-2), West Ham (3-1) leh Tottenham Hotspur (4-1) te hmachhawnpuiin, point khat chiah a hlawhchhuahpui a, match thumah tlawmin an inhamtang zo lo.