Lammualah inkhel hmuhnawm pathum

LBS Suzuki 21st Inter Branch YMA Football Tournament chu vawiin hian Lammualah khelh chhunzawm a ni dawn a, last 16 khelh hmabak match thum khelh a ni ang.

Vawiin chawhma dar 9:30 hian Bethlehem Vengthlang leh Sialhawk te an inkhel dawn a, inkhelh hun hma deuh mah se entu an ṭhahnem tho ang.

Chawhma dar 11:30-ah Hualngohmun leh Lengpui te an inkhel dawn a, an intum tawk dawn. Chawhnu dar 1:30-ah Salem Veng leh Thenzawl Jt te an inkhel dawn a, hetah pawh hian chak tur hriatthiam a har tho.

Sanga Vs Chawnga

Bethlehem Vengthlang hian coach ṭha nei lo pawh ni se, player ṭha tamna veng an nih avangin champion rinkai an ni pha. Tun ṭumah hian Mizo coach zinga sulhnu nei ṭha ber zinga mi Lalsangzuala Hmarin a enkawl avangin champion beiseina an nei sang hle.

Chutihrualin Aizawl khaw pawn aṭanga thawm nei ring leh ṭantu nei ṭha Sialhawk hi coach Chawngthansanga enkawl a ni. Sialhawkin Ramhlun North an hneh nawn theihna chhan pakhat chu Chawnga a ni a, MPL club Reitlang FC, Chanmari West, Bethlehem Vengthlang, Chhinga Veng leh Chanmari FC te enkawl tawhtu coach hnathawh a langah a ngaih theih.

BVT leh Sialhawk inkhel tur hi Sanga Vs Chawnga tiin a sawi theih a, chutihrualin Bethlehem Derby ti pawhin a sawi theih. Sialhawk ipte pui banna hi Bethlehem a ni a, an veng ṭhenawm BVT nen an inkhel dawn.

Sialhawk innghahna tur chu R. Laldanmawia a ni dawn a, chutihrualin player mal aṭanga teh chi an ni lo. An ṭhatna tak chu Sialhawk tana theihtawp an chhuah ṭhinna hi a ni. BVT lamin K. Lalṭhathanga (Puitea) an kawl a, defender PC Laldinpuia hi a rinawm viau bawk.

Coach Chawnga chuan, "BVT hi seeded zawk an ni a, keini lamin upset thlentir kan tum ang. BVT hi ka enkawl tawh team an nih avangin ka hrechiang a, an ṭha tih pawh ka hria. Chutihrualin eng team pawh hmachhawn ila, kan theihna zawng zawng kan chhuah ang," tiin Vanglaini a hrilh. BVT coach Sanga pawhin, "Sialhawk boruak a ṭha a, dan an harsa dawn. Lammual a chhiat avangin khelh pawh an harsa viau ang," tiin a sawi ve bawk.

Hualngohmun vs Lengpui

CYMA Football 2023-ah nimin khan champion tawh Republic Veng an tla a, champion tawh zingah Lengpui chiah an dam ta. Lengpui hi ṭum dang ang bawkin an la ṭha a, chutihrualin an khingpui tur Hualngohmun hi an ṭha ve tho.

Hualngohmun hian mahni pawha tlarhnung tibuai thei Vanlalthanga an kawl a, MPL player ṭha dang an kawl nual. Lengpui lamah ISL, I League leh MPL-a tawnhriat nei an awm nuk a, inkhel hmuhnawm a ni ang.

Salem Veng leh Thenzawl

Salem Veng hi tun inelnaa thawm nei ring ber zinga mi an ni. Coach Lalrindika Hmar chuan, "Player inhliam kan ngah a, inkhelh hun a zawn avangin player-ten ngai an awh hman meuh lo. Thenzawl lakah pawh hian kim takin kan khelh theih ka ring lo," tiin Vanglaini a hrilh.

Salem Veng hi an kim lo a nih pawhin Thenzawl Jt lakah rinkai an la ni dawn tho a, chutihrualin Thenzawl hi Ramhlun South hnehtu an ni. Salem Veng hian an match hnuhnung berah Lungdai lakah goal an khung thei lo a, he inkhel result hi Thenzawl tan infuihna ṭha tak a ni ang.