Manchester khawpuiah tu nge lawm zawk dawn?

Inrinni zan dar 7:30 a ri ang a, Manchester khawpui chuan khawdang a hawi dawn lo - tam tak chu London khawpuia Wembley Stadium-ah an ṭhu ang a, tam takin chhungkuaa television thlir hoin, inkhel en theihna hmun 'bar' leh restaurant te pawh an lun leh khawp ang.

A chhan maw? Hmelma kumhlun, Manchester khaw chhul chhuak ropui zawk nih inchuh reng renga hun hmang Manchester City leh Manchester United an inkhelh dawn vang a ni - inkhel satliah a ni dawn lo a, FA Cup final a ni dawn!

Zanin dar 7:30 hian City leh United te hian FA Cup champion nih an inchuh dawn - hnehna chang zawkin nomawi nen Manchester khawpui an la fang ngei ang a, chutih huna a champion lo zawk tana a nat turzia chu thua sawifiah chi a ni lo.

Chuvang chuan zaninah hian team pahnih tan thih thaa beih a ṭul dawn a, inkhel a hmuhnawm loh ring suh - City-in treble champion nih an tum a, United-in League Cup leh FA Cup chawi ve ve an duh bawk e!

Inbeihna chu

Zanina team pahnih intawng tur hi champion inchuh a ni satliah lo a, indonaa chak zawk nih inchuh ang maia boruak sosang leh rorum a ni - minute 90 hnuah tu zawkin nge hnehna hlado chham dawn chu, hunin a hril thuai ang.

Manchester City-in Premier League nomawi an chawi tawh a, FA Cup leh Champions League-ah final an lut bawk. Pep Guardiola team hian treble champion nihna chance an nei dawn, tihna a ni a, hna hmasa atan zanina chak a ṭul.

Pep Guardiola-a'n tlarhmaah Erling Haaland chu innghah nan ber a hmang leh dawn tih a chiang a, a hnungah Kevin De Bruyne a awm bawk chuan City tan goal khung kawngah harsatna a awm lo tura ngaih a ni.

City squad hi en ila, Ilkay Gundogan, Bernardo Silva, Jack Grealish, Ruben Dias, John Stones, Rodri, Manuel Akanji leh Kyle Walker te ho an la awm a, hmachhawn an châkawm lo ang.

United an ṭha

City ṭhatzia kan sawi rualin, Manchester United ṭhatna sawi nep a thiang lo a, hliam vanga inlan lo tur Anthony Martial (malpui), Lisandro Martinez (ke phah), Marcel Sabitzer (khup) leh Donny van de Beek (khup) te pawh hi Red Devils tan buaina an tling lo.

Tlarhmaah tun season-a goal 30 khung tawh Marcus Rashford hi United tan innghahna a ni leh dawn a, pui turin Jadon Sancho leh Bruno Fernandes an la nei bawk - City laka hnehna chan tum ngam tur khawpin an ṭha tawk.

Midfield-ah Casemiro leh Christian Eriksen te chu inkawp leh tura ngaih an ni a, Manchester City tan hna a awlsam tura i ngai a nih chuan i ngai sual ang - tlarhnungah defender ṭha Raphael Varane a awm bawk.

Mahse, Martinez inhliam avangin Varane hian Victor Lindelof chu tlarhnung laiah a kawppui tura ngaih a ni a, Lindelof hi player ṭha tak ni mah se a tihsual tawh ṭhinte thlirletin game boruak sanga 100% a rin ngam chu a harsa deuh.

Thawnthu hlui

Premier League khelh zawh tak chiahah City leh United vawi hnih an intawng a, Etihad Stadium-ah 6-3 ngawtin City an chak a, Old Trafford-ah erawh 2-1 in an tlawm thung - team pahnih an intiat tawk hle.

Mahse, United hian theihnghilh theih loh pakhat an nei ang - Etihad-a Phil Foden leh Haaland ten hattrick an lo siam khum kha! United tan player pahnihin hattrick siam nana an hmang kha a na a, result hmanga thawi dam chi a ni.

Varane chuan, "KDB-a'n Haaland-a tana ball a pek ṭhin hi chu dan a harsa em em a, anni pahnih inpawhna leh inthlunzawmna hi tihchah kan tum tur chu a ni," a ti a, a thusawi hi ṭawmpui loh a harsa!

French defender chuan 2-1 a City an hneh chungchang kha thlirletin, "Huaisen taka awm a ngai tih kan hria a, KDB leh Haaland inpawhna kha chhut chat a ṭul tih kan hre sa," a ti a, anni pahnih inkawp chuan thil danglam tam tak an thlen theih thu a sawi.