Treble champion turin engkim ka huam - Haaland

Manchester City striker Erling Haaland chuan treble champion ni tura a tih theih apiang a tih tur thu a sawi a, zanin dar 7:30-a an hmachhawn tur Manchester United tan thu hriat nuam a ni lo ang.

Kum 22 mi Haaland chuan, "Treble champion nih a, record siam chu a ropui dawn em asin. City-in min lakluh chhan pawh hei hi a ni a, zep a ṭulna ka hre lo," a ti hem mai!

Manchester United chuan kum 1999 khan Champions League, Premier League leh FA Cup nomawi an lo chawi tawh a, English club zinga treble champion thei awmchhun an la ni reng.

Haaland chuan, "A hlu dawn lutuk. Treble champion kan nih theih nan ka tih theih zawng zawng chu ka ti ang - hei hi ka lo mang phan ṭhin chu a ni a, ka mumangte a tak ram an chan ka beisei," a ti.

Norwegian striker Haaland hian tun season inelna hrang hrangah match 51 khela goal 52 khungin assist vawi kua a nei a, ani dan tum hi United tan zaninah hna pui bera neih a ṭul ang.

Borussia Dortmund striker hlui chuan, "Treble champion erawh a awlsam dawn lo. Team ṭha tak pahnih hmaah final pahnih kan khel dawn a ni a, kan beiseite a hlawhchham theih nan theihtawp an chhuah ve dawn tho.

"Chak châkin an tuihal dawn a, an inpeih em em dawn. Kan ṭhat dan bera kan khelhchhuah a ṭul a, kan ṭhat dan bera kan khelhchhuah phawt chuan treble champion turin chance kan nei ṭha ngawt ang," a ti.

Premier League-a goal 36 khungtu Haaland chuan, "Season tluanin PL champion nih kan tum a, kan champion ta kha chu ka thaw huai mai. Tunah chuan final pahnih kan bak a, tunah chuan chawlhte kan hman hmain heng final pahnihah hian rilru pek a ngai a ni," a ti a, Premier League nomawiah a duhtawk lo.

United-in FA Cup final-ah City hneh ta se, Carabao Cup an chawi tawh sa an belhchhah dawn, a ni satliah lo. English club zinga treble champion awmchhun an nihna chu an chhawm nung reng thei dawn tihna a ni nghal - an hmelma City-in an tih theih ang an lo tihve hi an duh dawn lo.

Haaland chuan, "Final awlsam tak a ni dawn lo. Kan game pangngai khelhchhuah mai kan tum tur a ni. Ngaihtuahna sen lutuk loh a ṭul - keimahni lam chauh inen a, kan game khelh tur kan khelh mai a ṭul.

"A tawpah enge kan an, kan hria ang chu. Minute 90 khelh tur a ni a, a ti ṭha zawk tan hnehna chan chance a sang dawn a ni," a ti a, minute 90 chhung tha thlah loa an khelh a ṭul thu a sawi.

Haaland-a duthusam te thleng thei tak ang maw? Zaninah nomawi pakhat chawi leh phawt a ṭul e.