Jokic hoin Nuggets an chak hmasa

Basketball inelna lian NBA Finals chu nimin zing khan game 1 khelh ṭan a ni a, inkhel hmasa berah hian Nikola Jokic hoa khel Denver Nuggets chuan an mikhual Miami Heat chu 104-93 in an hneh.

Best of seven series hmangin chak zawk zawn tur a ni a, match hmasa a chak lo zawk tan pawh kawng a la awm. June 5, Thawhṭanni zing dar 6:00 hian game 2 an khel leh ang - Nuggets khelmualah bawk a ni dawn.

Nuggets thiampuipa Jokic chuan triple-double (27 points, 14 assists and 10 rebounds) neiin hnehna an chan theih nan a thawhhlawk hle. Heat lamin Serbian star dang thei an nei lo.

Kum 28 mi Jokic chuan, "Tuna pawimawh ber chu hnehna chan a ni, kan chak theihna tur a nih phawt chuan engpawh tih ka huam. Keimah chauh ni loin kan zavai khan kan khel ṭha vek," tiin a sawi.

Jokic hi point 26 neitu Jamal Murray chuan a thlawp ṭha hle a, anni pahnih bakah hian Aaron Gordon (16) leh Michael Porter Jr (14) te an langsar bawk. Heat lam tan Bam Adebayo chuan point 26 nei ve bawk mah se hnehna chan nan a tawk zo lo.