PSG tana Messi match hnuhnung ber

Lionel Messi chuan zanin dar 12:30 hian Paris Saint Germain tana a match hnuhnung ber a khel dawn - Argentina captain hi Europe khawmualpuia a inlanna hnuhnung a ni thei bawk.

PSG manager Christophe Galtier chuan tun season tawp rualin Messi a chhuak dawn tih a sawi chiang a, hei vang hian PSG leh Clermont Foot inkhel hi a hun tawp a ni ang.

Kum 35 mi Messi hian 2021 July khan Barcelona tana a contract a hmang zo a, man nei loin PSG a pan. Paris club tana a contract neih lai hi tunah chuan a hmang zo leh tawh, season khat atana pawhsei theih chu a pawtsei dawn lo.

PSG coach Galtier chuan, "Footballer piang tawh zinga ṭha ber ka enkawl thei hi ka lawm, a tan chuan tun ṭum hi PSG jersey ha chunga a inlanna hnuhnung ber a ni dawn, fans lamin zah leh a phu ang ngeia an chawimawi ka beisei," a ti.

Messi leh PSG hian contract thar chungchangah a thuphunga inremna an nei hman a, mahse ziakin an dah fel thei lo. World Cup a zawh hnuah phei chuan player leh club hian boruak ṭha an nei chhunzawm meuh lo.

Club phalna tel loin Messi hi Saudi Arabia lamah a zin a, hei vang hian hrem a ni. Hrem a nih hnuah Messi hi fans lamin an au el zui a, ani bakah hian Neymar, midfielder Marco Verratti leh coach Galtier te chenna in bulah fans lungawi lo an pungkhawm hial.

Spanish football writer Guillem Balague chuan Messi hian a hma hun a tichiang hnai tih a sawi a, mahse media tam takin Barcelona lama kir leh tur anga an sawi chu thu dik lo a ni a ti thung.

Tun season inelna hrang hrangah Messi hian PSG tan goal 21 khungin a ṭhiante khung tur vawi 20 a siamsak bawk. Ligue 1 champion tan season hnih a khelh chhungin match 74 aṭangin goal 32 a khungsak bawk a ni.