Set hloh loin Zverev a chak nawn

Nikuma hliam na tak a tawrhna khelmual Court Philippe Chatrier-ah ngei mai Alexander Zverev a inkhel leh thei tawh a, German tlangval hian a khingpui world number 86 Alex Molcan chu 6-4, 6-2, 6-1 in a hneh.

Zverev hian a tawn san lai chuan world number 2 pawh a ni tawh, tun hnaiah hliam vangin a inkhel tam lo a, number 27-naah a tla hniam. French Open hi chu a tan thil thar a ni lo thung, a vawi sarih nan third round a inhlangkai.

Season hmasa khan Zverev hian semifinal a lut a, final luh inchuhin Rafael Nadal nen an intum. A kerek a tliak a, court aṭangin wheelchair hmanga nawr chhuah a ngai hial, tunah erawh ṭha takin a inkhel thei leh tawh a ni.

Kum 26 mi Zverev chuan, "A nihna tak sawi chuan Court Philippe Chatrier-a ka kir leh tur chu ka hlauthawng rilru hle, chutihrualin he hmun hi hliam na tak ka tawrh tawhna ni mah se ka ngaina em em em thung," a ti.

Olympic champion hian a match lehpekah chuan Frances Tiafoe a tum dawn. Seeded 12-na Tiafoe hian inkhel dangah American tlangval Aslan Karatsev chu 3-6, 6-3, 7-5, 6-2 in a lo hneh ve thung.

Inkhel dangah seeded pathumna Casper Ruud chuan Giulio Zeppieri chu 6-3, 6-2, 4-6, 7-5 a hnehin second round a paltlang ve bawk. Ruud hian third round-ah chuan Chinese tlangval Zhang Zhizhen a hmachhawn leh dawn a ni.

Season hmasa khan Ruud hi a vanduai - US Open leh Roland Garros final a lut a, mahse nomawi inchuhna inkhelah a chak lo zawkah a ṭang ve ve. Kum 24 mi hian a vawi khat nan Grand Slam nomawi chawi a beisei mek.

Ningani zan khan Suzanne Lenglen lamah ennawm chhawpchhuah a ni bawk. Daniel Altmaier chuan seeded pariatna Jannik Sinner chu 6-7 (0-7), 7-6 (9-7), 1-6, 7-6 (7-4), 7-5 in a hneh a, an inkhelh hun chhung hi darkar nga leh minute 26 a tling hial.

French Open an khelh tawh zawng zawngah Altmaier leh Sinner te inkhelh hi match rei pangana a tling phak hial. Altmaier chuan, "Inkhel hriatreng hlawh tawh tur a ni a, ka tan chuan a hlu khawp mai," tiin a sawi.

Altmaier hian a match lehpekah chuan Grigor Dimitrov a tum dawn. Kum 2014 Wimbledon semifinalist hian seeded 28-na Emil Ruusuvuori chu 7-6 (7-4), 6-3, 6-4 in a lo hneh ve thung a, third round-a an inkhel tur hi a hmuhnawm ang.