Red Bull kan chak vek thei ang - Verstappen

Max Verstappen chuan tun season Formula 1 intlansiak zawng zawngah Red Bull chu an chak vek thei tih a sawi a, chutihrualin team pakhatina hnehna chan vek chu thil harsa tak a nih tur thu a sawi tel bawk.

Car intlansiakna sang ber hi tun seaason atan vawi nga an tlan tawh, inelna an neih tawh chinah hian Red Bull an la chak fai vek - champion lai Verstappen chu vawi li chakin, a teammate Sergio Perez chu ṭum hnih a chak thung.

Dutch tlangval Verstappen chuan, "Tuna a lan dan mai chuan kan chak vek theih a rinawm, mahse chu chu thil tih theih loh tluka harsa a ni thung. Kan car nena inmil vak lo tlankawnga kan tlan hun pawh a la thleng dawn.

"Intlansiak ngawr ngawr a ni lo a, ruahmanna fuh lo palh leh qualifying tan fuh loh palh pawh a awm thei bawk. Chuvangin thil thleng thei a tam lutuk a, engmah hi sawi lawk thui ngam a ni lo," tiin a sawi.

Red Bull elpui ber tura ngaih Mercedes leh Ferrari ten beisei an phak lo a, season ṭan hmaa rin hlawh ni lem lo Aston Martin chu Fernando Alonso hoin an hnawk phak viau thung - inelna hmuhnawm an chhawp chhuak chhunzawm ang.

June 4, Pathianni tlai dar 6:30 hian tun season intlansiak pasarihna atan Spanish Grand Prix an tlan dawn a ni.