Saudi Pro League beisei sangtu Ronaldo

Cristiano Ronaldo chuan a khelh mekna Saudi Pro League lakah beisei a nei sang a, tun anga chak taka hma an lak zel chuan engtik niah emaw chuan khawvel league ṭha zual pangana an nih phak a rin thu a sawi.

Saudi Arabian club hoin sum an ngah a, football tan sum hman an ui lo. Asia rama awm ni mah se Al Nassr forward Ronaldo hi khawvela footballer hlawh hnem ber a ni mek, player langsar dang hming pawh a ri mek.

Tun dinhmunah hian Lionel Messi, Karim Benzema leh Luka Modric te chu Saudi Arabian club ho nen sawizawm an ni vek, an kal dawn ngei em, tih la chiang lo mah se, engtik niah emaw chuan hlawh tam tak nei turin an la pan rei a rinawm.

Kum 38 mi Ronaldo chuan, "Player ṭha leh hming langsar, naupang leh upa deuh tawh te pawh an lo kal a nih chuan lawm takin kan lo dawngsawng ang, a chhan chu Saudi Pro League hian eng emaw kawng zawng talin hma a sawn phah dawn a ni.

"League ṭha tak kan nei a, hmasawnna tur erawh tam tak a la awm. Hmunhma ṭha zawk, match official leh VAR thlengin a rang lamin tun aia ṭha leh changtlung chu kan mamawh," tiin a sawi.

Manchester United, Real Madrid leh Juventus tan pawha khel tawh Ronaldo hi Europe lama kir leh tur anga sawi thawm a awm. Mahse, Ronaldo chuan, "He hmunah hian ka hlim tawk a, season tharah pawh ka awm chhunzawm ang.

"Tuna hna an thawh dan leh hmasawnna rahbi an tuk dan thlir chuan, tun ang zela kum nga an kal thei a nih chuan Saudi League hi khawvela league ṭha zual panga zingah a lang phak ang," tiin a sawi.