Swiatek leh Rybakina an tlang

French Open champion lai Iga Swiatek leh Wimbledon champion Elena Rybakina te chuan third round an lut ve ve, player pahnih hi tunlai hmeichhe tennis tihmuhnawmtu leh champion tura rinkai an ni.

Niangni zan second round inkhelah Swiatek hian American nula Claire Liu chu 6-4, 6-0 in a sawp, kuminah hian a champion leh a nih chuan tun hnai kum li chhungin Paris khawpuia vawi thum a hlawhtlinna tur a ni ang.

Polish nula Swiatek chuan, "Champion sawi a la hun lo, tunah chuan third round chauh ka la ngaihtuah dawn. Match indawtin ngaihtuahna ka hmang chawp zel zawk dawn a ni," a ti. Chinese nula Wang Xiyu nen an intum leh dawn.

Inkhel dangah Rybakina chuan Linda Noskova chu 6-3, 6-3 in a hneh. Kazakhstan nula hian French Open inbuatsaihna Italian Open nomawi kha a chawi a, tun hnaiah clay court-a match riat a khelh tawhah a chak fai vek.

Swiatek leh Rybakina te bakah Belarus nula Aryna Sabalenka te tun hnaiah an kal fawr hle, anni pathum hian Grand Slam hnuhnung pali an insem vek - French Open nomawi pawh hi na takin an inchuh tura ngaih a ni.