La Liga puanzar an khar dawn

Spanish La Liga match tawp ber chu Pathianni zanah khelh a ni dawn a, tun season atan Spanish top flight league a tawp ang - league match 10-te hi Pathianni zan dar 10:00 leh 12:30-ah vek khelh a ni dawn.

Champion chiang tawh Barcelona chu Pathianni zan dar 12:30-ah inalnin Celta Vigo an lenchilh dawn a, Real Madrid chuan Pathianni zan dar 10:00-ah Athletic Bilbao mikhualin, Pathianni zan dar 10:00-ah vek Atletico Madrid chuan Villarreal an lenchilh ang.

La Liga aṭang hian champion Barcelona bakah Real Madrid, Atletico Madrid leh Real Sociedad chu season thara Champions League khel tur an ni a, Sociedad hian Pathianni zan dar 10:00-ah vek Sevilla an mikhual dawn.

Sevilla hian league kaltlang chuan European football an khel phak lo a, mahse, Europa League-ah an champion avangin season tharah Champions League an khel dawn - La Liga-in European football-a club inelna sang berah team panga an thawh dawn tihna a ni.

La Liga aṭang hian Segunda division lamah team pahnih an tla leh dawn a, Espanyol leh Elche chu tla tur chiang niin, Almeria, Cadiz, Celta Vigo, Getafe, Real Valladolid leh Valencia te chu la tla thei vek an ni.

Valladolid hian table-ah point 39 nei mekin, table-ah 18-na an ni mek. An vanneihna chu anmahni ang thoa relegate thei Getafe an hmachhawn dawn a, Pathianni zan dar 12:30-ah Getafe hi an hneh chuan an him ang - chak ngei ngei a ngai thung.

Real Valladolid hian Getafe hi an chak loh chuan an tla chiang a, team dang panga an him ang - an draw chuan point 40 an hmu ang a, team dang inkhel result-ah innghat tel chungin him theih dan an nei ang.