CYMA Football-ah Champion thar an awm dawn
LBS Suzuki 21st Inter Branch YMA Football Tournament quarterfinal chu vawiin hian Lammual leh RG Stadium-ah khelh a ni dawn. Lammualah Bawngkawnin chawhma dar 11:00-ah Khawzawl Vengthar an hmachhawn ang a, chawhnu dar 1:30-ah Durtlang leh Tlangnuam an inkhel zui ang.
Aizawl South II team pahnih Salem Veng leh Venghnuai an la dam a, RG Stadium-ah an inlan dawn. Chawhma dar 11:30-ah Venghnuaiin Bethlehem Vengthlang an hmachhawn ang a, Salem Veng leh Hualngohmun te chawhnu dar 2:00-ah an inkhel dawn bawk.
Rinkai Bawngkawn
Bawngkawnin Armed Veng field-ah fiahna hautak paltlangin Republic Veng an hneh a, hemi hma hian team ṭha Bairabi Joint leh Khawlailung te an hneh tawh. K. Malsawmkima enkawl team hian Republic Veng an hneh ṭum hian MPL best player MC Malsawmzuala, Santosh Trophy-a Karnataka champion puitu Lalremtluanga bakah senior player Lalnuntluanga leh Ronald Zothanzama te chhawr loin an la dah thei.
Khelmual chhung lamah Isak Vanlalruatfela leh Augustine Lalrochana bakah MS Dawngliana, Lalromawia leh Zonunmawia ten mipui mit an la hle. Bawngkawn squad a chhah avangin Lalṭhakima captain-na hnuaia khel Khawzawl Vengthar tan hna a hautak dawn a, football-ah erawh thilmak a thleng fo.
En châkawm Durtlang Vs Tlangnuam
ITI Vengah Edmund Lalrindika te an khel a, an ngam loh chu Durtlang a ni. Durtlang hian Ricky Lallawmawma chu captain atan hmangin tlarhnungah Lalchungnunga leh Hmingthanmawia (Valpuia) te an awm. K. Vanlalruata enkawl team hi an ṭha a, mahse wing back an nei ṭha bik lo - hei tak hi inkhel tien châkawmtu tur a ni.
Tlangnuam hian champion ngun ber Armed Veng chu an mualah ngei an hneh thei a, team vantlang YMA Mission Veng lakah goal nga ngawt an khung thei bawk. Durtlang hi squad an neih ṭhat zawk avangin rinkai chu an ni dawn a, mahse veng mipui puihna nen Tlangnuam hian hnehna an chang a nih pawhin thilmak a ni lo ang.
RG Stadium lam hi
Venghnuai leh Bethlehem Vengthlang inkhel tur hi en châkawm a tling. MPL club nei Venghnuai hian ṭum dang zawng aiin player an nei ṭha a, coach Lalsangzuala Hmar enkawl BVT tan pawh a harsa dawn. BVT hian tlarhma lamah duh thala player siksawina tur an nei bik lo - chutihrualin tlarhnungah PC Laldinpuia a awm tih hriat a ṭha a, midfield-ah K. Lalṭhathanga a awm bawk.
RG Stadium inkhel pahniha en châkawm zawk tur chu Hualngohmun leh Salem Veng inkhel tur hi a ni a, team ṭha ve ve an ni. Salem Veng squad a chhah ṭha tih hi tualchhung football ngainatute 'titi' a tling a, Hualngohmun pawhin player an nei ṭha.
Salem Veng hi coach Lalrindika Hmar enkawl a ni a, MPL-a a player enkawl Vanlalthanga leh a ṭhiante laka hnehna an chang thei a nih chuan MPL final-a a hneh loh coach Sanga nen inhmachhawn theih dan a awm ang.
Semifinal duhthusama ngaih theih chu Bawngkawn vs Durtlang, BVT Vs Salem Veng a tih theih a, mahse chawlh hun a rei loh bakah inkhelhna hmun thlak kual nasat avangin eng result pawh a thleng thei thung.