Team special Sialhawk an tla

CYMA Football-a team ngaihven hlawh ber Sialhawk zinkawng chu Inrinni khan Bethlehem Vengthlangin an tihtawpsak. Lammual inkhelah BVT tan Lalruatkima leh Suanngaihmuana ten goal an khung a, Sialhawkin a chhanletna an nei lo.

Sialhawk hian Inter Village Football 2022-ah khan final an lut a, ṭantu an ngah hle. Tun ṭum CYMA Football-ah pawh inelna ṭan hma hauhin boruak an siam a, ngaihven an hlawh. BVT nena an inkhelh hun pawh hi chawhma dar 9:30 ni mah se Lammual mawi tham entu an nei tho.

Sialhawk coach Chawngthansanga chuan, "Tualchhung football-ah hian chawhma dar 9:30-ah Lammual khat hi ka la hmu ngai lo. Hemi thlentirtu Sialhawk ṭantute chungah lawmthu ka sawi a, min thlawpnaah ka lawm takzet. Theihtawp kan chhuah a, kan tum ram kan thleng thei lo nachungin kan thlen chin an pawm thiam kha a hlu a ni," tiin a sawi.

Lammuala last 16 inkhelh zawh hian Sialhawk ṭantute hian an hneh loh Bethlehem Vengthlang chungah zahna leh lawmpuina lantirin 'Bethlehem Vengthlang' tiin an au rual a, an chet dan a entawntlak hle. Inkhelh banah an sulhnu an tifai leh vek bawk.

Salem Vengin Thenzawl Jt an hneh theih nan captain Joseph Lalnunpuia'n minute 37-naah freekick aṭangin goal mawi bik a khung a, Lalrindika Hmar hoten 1-0 in hnehna an chang. Aizawl khaw pawn team ṭha pahnih Hualngohmun leh Lengpui inkhelah goal a lut lo a, penalty shootout-ah CYMA Football-a sulhnu ṭha zawk Lengpui an vanduai. Hualngohmun hian champion pui theih tur player an kawl a, team ṭha zinga chhiar tur an ni.