Premier League (✓); FA Cup (✓); Champions League (?) United ngamtu City tan ropuina ram a hnai zel

Israel faten nghakhlel taka khawizu leh hnute tui luanna, ramtiam Kanan an thlir ang deuh kha a ni - Manchester City fan-te pawhin an tana ramtiam 'treble champion' nih chu ring fan awk awkin an thlir a, a lo thlen ngei an beisei.

Inrinni zan khan Manchester City chuan FA Cup final-ah 2-1 in Manchester United an hneh a, champion nomawi an chawi - Premier League an champion tawh bawk a, tunah chuan treble champion turin Champions League chiah an bak ta.

Manchester City tan game boruak sanga inlar ṭhin Ilkay Gundogan bawk a inlar leh ta a, City captain hian goal hnih a khung - United tan Bruno Fernandes chuan penalty hmangin beiseina siam ve mah se awmzia a nei thui lo.

City hian June 10, Inrinni zan dar 12:30-ah Inter Milan nen Champions League final an khel dawn a, hnehna an chang a nih chuan kum 1999-a Manchester United tih loha English club zinga treble champion hmasa ber an ni ang.

Derby chu

FA Cup final-a Manchester derby hmasa ber a ni a, champion nih inchuhna final a nih piahlamah, club pahnih thawnthu 'hot' tak avangin inkhel boruak a sang zel a, team pahnih intawn hma rengin titi a tam.

City-in treble champion nih an châk thu an sawi chamchi a, United-in English club zinga a tithei awmchhun nih reng an duh a, champion châkna piahlamah, an hmelma beiseina tihtawpsak chu an 'duhthusam' a ni.

Mahse maw, United fan-te ngawihtir a, an 'mood' tifuh lo turin City-in hun an mamawh rei lo - second 12-na lekah Gundogan chuan mawi zetin a volley goal a, FA Cup final-a goal khung rang ber record a ni nghal.

Louis Saha chuan kum 2009 khan Everton tan Chelsea lakah second 25-na lekah a lo khung tawh a, he record hi German midfielder hian a rawn khum - goal ṭha tak a nih rualin ball kal dan chhut sualtu David de Gea chu dem theih tak a ni.

Beiseina siamtu

United player-ten thawk pawh an lak ṭhat hmain City-in goal an khung a, Red Devils tan tho leh turin hun a ngai - Pep Guardiola enkawl team-in game an thunun chhunzawm a, United-in goal an chhuah chhunzawm zat lo chu vanneihna tih loh rual a ni lo.

Minute lina lekah Kevin de Bruyne ball thlawh luh chu Rodri chuan hnai zetah kawh zetin a tauh a, goal hrulah a kal. A la tawp mai lo - Jack Grealish-a siamsak ṭha zet chu Erling Haaland-a'n duhthusamin a tlawh hman lo chiah chiah a, United an vannei.

Minute 30-na a ni a, United tan hun duhawm a her chhuak. Aaron Wan-Bissaka ball tauh chuan Grealish-a kut a per a, video assistant referee chuan referee Paul Tierney chu enfiah turin a ti.

Tierney hian khelmual sirah uluk taka a en hnuin penalty spot a kawk a, Bruno Fernandes chuan Stefan Ortega venah a chhuih lut - United fans thawm a ring ve leh ta thung a, United-in an hmelma City lakah beiseina thar an nei.

Mahse maw...

Uuited-in penalty an hmuh hnuah Fred-a'n KDB a tihtluk avangin City-in penalty beisei mah se, an beisei penalty hi pek an ni lo a, United tan centre back Raphael Varane-a'n hmahruaina goal khung theihna remchang a chhawr lo bawk.

Goal dang lut loin chawlhlawk hman a ni a, United-in beiseina thar nen khelmual lut mah se first half ṭantira hremtu Gundogan bawk an ngam lo a, German midfielder hian second half ṭan aṭanga minute rukna lekah an goal hnihna a khung.

Mual sir aṭanga KDB-a freekick aṭanga ball kal chu Gundogan-a ke bulah tak a tla a, kum 32 mi midfielder hian a la tar lo a nih tih pholan nan a lo 'volley' goal leh sak - De Gea bawk chu dem theih a ni a, Premier League golden glove dawngtu a nihna hmuh tur a awm lo.

Spanish goalkeeper hi Gundogan-a 'shot' dang turin a che rang tawk lo - chumi tifiahtu chu goal-a a luh hmain ball kha vawi hnih a sawt hman a, De Gea-a'n a dang hman chuang lo - a kut hmawrin a tawk ve zauh, tih zawng a ni!

A har a ni

Manchester United-in hnehna chan tum viau mah se Gundogan an ngam lo a, kil tinah Red Devils aia City ṭhat zawkna hmuh tur a awm avangin, champion phu zawkin nomawi an chawi, tiin a sawi theih.

Pep Guardiola-a'n defensive midfielder-a a chher mek John Stones hian a 'position' thar hi nuam a ti hle tih a lang a, a thiam a, a che vel a hmuhnawm a, a khel ṭha takzet - KDB leh Bernardo Silva te pawh football ngainatu tan chuan mit titlaitu an tling.

United hian League Cup champion nomawi chawiin, kum ruk hnua an champion hmasak ber a ni a, FA Cup hmanga belhchhah tum mah se an hlawhtling zo ta lo - mahse, season ṭantira Brighton & Hove Albion leh Brentford laka an tlawm dan thlir chuan, an season hman danah lawm tur an ni.

City-in Champions League final lam an thlir zui ang a, United-in thawm ṭhat an ngaihna lai an thlir zui thung ang - nomawi pakhat an nei a, Champions League an khel dawn bawk. Season tharah chuan fan-ten hei aia ṭha zawk an beisei dawn.