Hnehna nena bul ṭan TNT

Tata SK 712 Pro Volleyball League chu Zirtawpni zan khan khelh ṭan a ni a, champion lai Durtlang North chu Thutak Nunpuitu Team (TNT) lakah an chak lo. TNT hian season hmasa final-a an ngam loh lakah hnehna an chang nghal tihna a ni.

R. Dengṭhuama Indoor Stadium, Mualpuia inkhelah TNT tan Vanlalṭanchhana'n point 23 ngawt a hlap chhuak a, inkhel hmuhnawm takah 25-11, 25-21, 25-23 (3-0) in an chak. Valbuanga hi D3 Business Player of the Match atan thlan zui a ni nghal bawk.

Tualchhung volleyball inelna sang PVL-ah hian state pawn player chah luh phal a ni. Muanna Veng team TNT erawh tualchhung player hlangin an khel - a vawi khat nan Mizo hmanga champion an tum dawn a, bul chu an ṭan ṭha nghal hle.

Durtlang North tan player an chah luh Anup D Costa chuan point 18 nei mah se, a tihsual vangin an khingpui lamin point 10 ngawt an hmu. Tualchhung player an neih zingah point 10 nei tling phak an awm loh avangin an chak lo.

TNT hian an match pahnihna atan June 12, Thawhṭanni zanah Tuchangral an hmachhawn leh dawn. Durtlang North hian June 10, Inrinni zanah team ṭha Hunthar an hmachhawn ve leh bawk ang.

Inrinni zan khan hmeichhe inelna khelh ṭan ve nghal niin, champion lai Bethlehem Vengthlang chuan Bungkawn chu 25-15, 17-25, 26-24, 25-20 (3-1) in an hneh. Hnehna chan chan theih nana point 25 thawk chhuaktu Elisian Medai a langsar hle.