Champhaia football thiam ber Melbuk

Champhai District chhunga football inelna ngaihhlut Upa C. Keikhuma Memorial Inter Village Football Tournament 2023-ah Melbuk chu a kum zawnin an champion. Inrinni khan Chhangphut Field-ah final hi khelh a ni a, Melbuk hi goal thumin hnufual hman mah se hun tawpah 3-3 a ni. Penalty Shootout-ah Melbuk 4-2 in an vannei a, Champhaia football awptu an ni.

Final hmuhnawm bikah Zotlangin bul an ṭan ṭha a, Santosh Trophy-a Mizoram tana khel pha Lalbiakdika'n first half chhungin hattrick a siam a, goal pawh a ṭha hlawm hle. Second half-ah Melbuk coach Lalrintluanga'n (Saitea) subsitution awmze nei siamin midfielder Zonunmawia a luhtir a, inkhel a danglam ta vek.

Melbukin tan Chawnpui FC forward Lallawmsanga'n (Lsa) siphurh a sut ṭhen hnuah tualchhung player chhuak thar ṭha Robben-a'n goal hnih a khung belh. Hun pangngaiah 3-3 a ni a, penalty shootout-ah Melbuk vannei chhunzawmin 4-2 in an chak.

Melbuk coach Saitea hian Zotlang hi a enkawl tawh ṭhin. Saitea chuan, "Mahni team enkawl hlui hneh chu a hrehawm khawp mai a, mahse kan hna a ni miau si. Zotlang ka tawrhpui a, an hrehawm tihna hi ka hriatthiampui phakin ka hria," tiin a sawi a, an champion avanga a lawm thu Vanglaini a hrilh tel bawk.