German Cup champion RB Leipzig

RB Leipzig an champion ve leh ta - Inrinni zan khan German Cup final-ah Eintracht Frankfurt chu 2-0 in an hneh a, season zawnin DFB-Pokal champion an ni, tihna a ni.

Leipzig tan Christopher Nkunku leh Dominik Szoboszlai ten goal khat ve ve an khung a, hun tawp thlenga goal dang a luh loh avangin 2-0 in Leipzig an chak. Leipzig manager Marco Rose chuan, "Nomawi chawi a, mi tam tak hlimna thlentu nih chu a hlimawm takzet," tiin a sawi.

Season hmasa Europa League champion Eintracht Frankfurt erawh season zawna nomawi chawi an tumna a thamral a, Bundesliga-ah pasarihnaa season an khar avangin season tharah European football an khel dawn ta lo.

A hming Nkunku

Team pahnihin goal an khung lawk loh avangin extra time hmanga chak zawk zawn a ṭul mai dawn niin a lang hman a, mahse, a hunah tak Christopher Nkunku a inlar -minute 71-naah hmahruaina goal a khung.

Kum 25 mi Nkunku hian tun season-ah hliam vangin inelna hrang hrangah match 36 chauh khel mah se goal 23 a khung a, assist vawi kua a nei bawk - Chelsea nen sawi zawm mek a ni a, club sporting director Max Eberl pawhin, "Leipzig tana Nkunku match tawp ber a ni mai thei," tiin an striker chu chhuak thei a nih thu a sawi.

Nkunku hian minute 85-naah Szoboszlai khung tur pawh a siamsak a, an goal hnihna an khung meuh chuan chak tur a chiang tawh tiin a sawi theih - Frankfurt tan comeback-na chance a awm tawh lo.

Mangṭha Frankfurt

Frankfurt manager Oliver Glasner-a'n kum hnih a enkawl hnuah German club a chhuahsan dawn a, a club enkawl tana a match hnuhnung berah an chak zo lo - mahse, a hnathawh avangin Austrian manager hi hriatreng a ni tawh ang.

Glasner chuan, "Leipzig nen chungnung zawk awm loa kan innuai thei kha kan tan chuan chawimawina a ni - tun kum hnih chhunga kan hnathawhte hi ka chhuang hle. Kum hnih chhunga kan hun hman duhawm takte kha ka thlirletin, ka mur chuai chuai thei a ni," a ti.

Frankfurt tan Kolo Muani che thei viau mah se a pawimawh ber goal pawimawh a khung thei bik lo - French striker hian tun season-ah goal 23 zet a khung a, Bayern Munich leh Manchester United nen sawizawm a ni mek. Hetihlai hian goal 16 khungtu Daichi Kamada pawh AC Milan zawm tur anga sawi a ni.