Milan chhuahsan tur Ibra

AC Milan forward Zlatan Ibrahimovic chuan Italian club hi a chhuahsan dawn a, kum 41 mi striker hian football a la khelh chhunzawm zel dawn nge, club dang a zawm dawn, tih chu he thu buatsaih a nih lai hian a la chiang lo.

Milan chuan, "AC Milan chuan Zlatan-a hnenah kan hun hman hlimawm takte avang khan lawmthu a sawi a ni," an ti a, season hman zawh takah khan hliam vanga match li chiah khelin, goal khat chiah a khung a ni.

Ibra hian 2010 khan a vawi khat nan Milan hi loan-in a lo zawm tawh a, a hnu season-ah a ngheta zawm zuiin, season hnih chhunga match 85 khelin goal 56 ngawt a khungsak - Serie A nomawi a chawi bawk.

Milan hi a chhuahsan hnuah Paris Saint-Germain, Manchester United leh LA Galaxy tan a khel leh a, Major League Soccer club LA Galaxy a zawm kha chuan US lama inkhelh chawlhsan mai tura ngaihna a lian hman hle.

Mahse, season hnih khelin, match 58-ah goal 53 a khung a, December 2019 khan thla ruk chhung atana contract ziakin AC Milan-ah a kir - he season-ah hian match 20 khelin goal 11 a khung a, a contract pawhsei a ni.

Milan tan 2020-21 season-ah match 27 khelin goal 17 ngawt a khung a, season hmasa khan match 27-a goal riat khungin Serie A champion team-ah a tel. Tun season-ah erawh hliam vangin a inlan hleithei lo a, Milan khawpui a chhuahsan dawn ta.

Sweden tan vawi 122 inlana goal 62 khungtu Ibra hian Milan a pan vawi hnihnaah hian match 78 khela goal 37 ngawt a la khung theih avangin a theihna a la sang reng tih a lang a, chutihrual chuan a kum a tam tawh avangin hliamin a tibuai ngun ve ta deuh.