Swiatek tan hna a awlsam

French Open khelh laiah Iga Swiatek chuan a hmaa ding apiang a hneh zel. Polish nula hian Chinese nula Wang Xinyu lakah zahngaihna a lantir miah lo, set mai pawh lo in game khat pawh a hloh lo, a khingpui hi 6-0, 6-0 in a sawp.

World number 1 Swiatek hi a kal fawr rih hle, set a lak hnuhnung paruk zinga pali zetah chuan game hloh miah loin set a la thei. Last 16-ah chuan Lesia Tsurenko nen an intum leh ang.

A vawi thum nana Roland Garros title lak tumtu Swiatek chuan, "Tunah hian nuamsa deuha chak angin ka lang a ni mai thei. Set hloh loa chak theih chu duhthusam a ni, chutihrualin match zawng zawng a awlsam dawn tihna a ni lo," a ti.

Inkhel dangah seeded parukna Coco Gauff chuan Russian nula Mirra Andreeva chu 6-7 (5-7), 6-1, 6-1 in a hneh. American tleirawl hian hnehna chang turin fiahna hautak a paltlang thei a, a puitling tawh tih a lantirna a ni nghal bawk.

Season hmasa khan kum 19 mi Gauff hian final a lut, nomawi inchuhna inkhelah Swiatek a ngam lo. Tun season French Open khelh laiah pawh player pahnih hi champion thei tura rinkai an ni.