A tawp nan Inter Milan an chak

Inter Milan chuan Inrinni zan khan tun season atana an Serie A match hnuhnung ber an khel a, an mikhualna ramah Torino chu 1-0 in an hneh. Goal awmchhun hi Marcelo Brozovic-a'n minute 37-naah a khung a ni.

Nerazzurri hian inelna hrang hranga match an khelh hnuhnung 12 aṭangin vawi 11 ngawt hnehna an chang thei. Coach Simone Inzaghi chuan inrintawkna sang tak nen Champions League final an khelh theih ngei a beisei thu a sawi chhuak.

Torino lakah hian Romelu Lukaku leh Brozovic ten inkhel bul an ṭan a, an khel chhe lo. Manchester City nen an inkhelh hunah Anni pahnih nge Edin Dzeko leh Henrikh Mkhitaryan ten bul ṭan zawk ang tih hriatthiam a harsa ta hle.

Inter manager Simone Inzaghi chuan, "Tun season chhunga match 56 kan khelh tlinna chiah a ni a, khelh hmabak pakhat kan la neih theih avangin ka lawm. Chet fuh tawk loh changte chu nei ve mah ila, tuna kan awmna hi a chhe hran lo.

"Tunah chuan Champions League final chiah ngaithuah tur kan nei tawh. European football inelna sangah hian a hmawr bawk turin kan inpeih tawh a, inrintawkna pawh kan nei sang hle ang," tiin a sawi.

June 10, Inrinni zan hian Inter Milan leh Manchester City ten Ataturk Olympic Stadium, Istanbul-ah Champions League final an khel ang.