Thla nga dang chawl leh tur Nadal

Rafael Nadal chu a khel bawr hliam zai a ni a, a rei lo berah thla nga chhung chu tennis khel loa a chawlh leh rih a ngai dawn. Spanish star hian January thlaa khelh zawh tak Australian Open hnuah match a la khel leh lo.

Tuna a lan dan chuan October thla hma chuan a inkhel dawn rih lo tihna a ni a, grass court inelna lian Wimbledon leh Grand Slam pali zinga hnuhnung ber US Open pawh a khel thei dawn lo tihna a ni.

Inrinni khan Nadal hian kum 37 a tling tawh, hmanni deuh khan season tharah tennis chawlhsan a rilruk thu a lo sawi tawh a, a hliam hi a dam thei mai lo a nih chuan a duh aia hmain inkhelh a chawlhsan thut lo ang tih pawh sawi theih a ni ta lo.

Nadal-a thupuangtu Benito Perez-Barbadillo chuan, "Rafa chuan enkawlna a dawng leh ṭan ta a, tuna a hliam hi damfel tur chuan thla nga chhung tal hun a mamawh dawn," tiin a sawi.

Grand Slam vawi 22 champion tawh Nadal hian a piancham lawmpuitute leh a hliam dam leh thuai tura duhsakna hlantute chungah lawmthu a sawi a, kum 19 zet hnua French Open a khel thei lo chu hrehawm a tih thu a sawi bawk.