Messi leh Ramos ten PSG an mangṭha

Lionel Messi leh Sergio Ramos te chuan Inrinni zan khan Paris Saint Germain tana an match hnuhnung ber an khel a, tun season Ligue 1 match hnuhnung berah hian nomawi an chawi nghal bawk.

Paris khawpuia inkhelah defender Ramos-a'n goal hmahruai a tauhlut a, forward Kylian Mbappe chuan a khung belh. PSG hi chiang taka chak tura ngaih ni mah se, mikhual Clermont lamin Johan Gastien, Mehdi Zeffane equalised leh Grejohn Kyei te hmanga chhangletin 3-2 in an lehthal daih.

A team chakpui zo lo mah se Mbappe chuan a zawna a vawi nga nan Ligue 1 Golden Boot a dawng. France international hian goal 29 a khung a, amah hnaih bertu Lyon striker Alexandre Lacazette aiin goal hnihin a khung hnem.

Argentina captain hlui Messi-a'n contract a hmang zo a, a pawtsei dawn lo. PSG tan hian match 75 aṭanga goal 32 a khungsak bak chu a belhchhah thei ta rih lo - ani ang bawk hian Ramos tan PSG jersey a hak hnuhnun ber a ni ve bawk.

Messi hian khawi lam nge a pan dawn a la chiang lo. Saudi Arabia club Al Hilal leh Major League Soccer club Inter Miami te chu hming langsar an ni. Italian journalist Fabrizio Romano chuan Messi hi tun hnaiah European club lian ṭhenkhatin an ngaihven tih a sawi bawk a ni.

Inkhel dangah Auxerre chuan an mikhual Lens chu 3-1 in an ngam lo a, point an hmuh belh theih tak loh avangin France rama football inelna sang ber aṭangin an tla. Nates erawhin Ganago-a goal hmangin Angers 1-0 a hnehin an inham tang thung.