Hazard-a'n Real Madrid a chhuahsan dawn

Mi tam takin Cristiano Ronaldo hmun ruak luah tura an beisei Eden Hazard chuan beisei anga a khelh theih loh hnuin Real Madrid a chhuahsan dawn a, kum khat cham turin contract la nei mah se Spanish club nen hian contract titawp turin inremna an nei a ni.

Hazard hian kum 2019 khan pound maktaduai 89-in Chelsea aṭangin Real hi a zawm a, a man hi pound maktaduai 150 thlenga sang chho thei tura tih a ni. Mahse, Blues legend hian Real tan match 76 chauh khelin goal sarih a khung a, assist vawi 12 a nei thei hram!

Hliam vanga Real tana match a khelh loh zat hi match 78 ngawt a ni a, tun season-ah match ruk chiah a khel bawk - Chelsea tana match 352-a goal 110 ngawt a khungte nen chuan a hun hman dan hi a inang lo hle.

Real chuan, "Hazard hi kan duhsakna kan hlan a, a career kal zel turah hlawhtlinna duhawm tak a chan kan duhpui a ni," tiin, an hmangaih thawnthu ziah tum, beisei phak ta lo chu an thlah.

Hazard hian Real-a a cham chhungin Champions League, FIFA Club World Cup, European Super Cup, La Liga (2), Copa del Rey leh Spanish Super Cup (2) nomawite a chawi hman a ni.

Hetihlai hian Real-a a contract hmang zo tur Marco Asensio pawhin Real a chhuahsan dawn a, kum 27 mi attacking midfielder hian Real thlahna social media lamah a post tawh.

Asensio hian Real tan season riat chhungin match 285-ah goal 61 a khung a, league nomawi vawi thum chawiin, Champions League-ah vawi thum a champion pui bawk.