Europa League Quarterfinal-ah Wolves inhlangkai

Wolverhamton Wanderers an kaltluang zel a, kum 48 hnua a vawi khat nan European football-ah quarterfinal an lut leh ta. Nuno Espirito Santo naute hian inkhel pahnih belhkhawmah Olympiakos chu 2-1 a hnehin Europa League last 16 an paltlang.

Team pahnih te intawn hmasakah 1-1 in an inhnehtawk. Ningani zan khan second leg khelh niin, minute riatna lekah Raul Jimenez chuan peanlty chhuih lutin a team hi 1-0 in a chakpui a, an intawn tawhna nena belhkhawmin a chungnung zawk an ni.

Premier League club hian August 11, Thawhlehni zan hian quarterfinal-ah chuan Sevilla an hmachhawn leh ang. Spanish club hian inkhel dangah AS Roma chu 2-0 in an lo hneh ve bawk.

Molineux Stadium-a inkhelah Wolves lamin an mamawh goal an hmu har lo. Olympiakos keeper Bobby Allain-a'n winger Daniel Podence laka a foul avangin penalty a chawi a, a pet turin striker an neih hriam ber Jimenez a rawn pen chhuak.

Mexican striker hian a hun ṭha bawhpelh loin goal-ah a chantir a, season kal laia inelna hrang hranga a goal 27-na a ni. Nikum July 25 aṭang khan Wolves hian match 59 an khel tawh, chung zingah chuan goal an khung hma ber ṭum a ni.

Wolves lamin inkhel bul an ṭan fuh a, goal pawh nei hma viau mah se defender Jonny chu minute 17-naah hliam vanga lakchhuah a ngai, an khel mar ṭha laiin a tuar phah viau - Olympiakos lam an insiamṭha thung.

Midfielder Mady Camara-a'n goal a sutah inngai mah se VAR hmanga endik a nih hnuah offside vanga hnawlsak a ni. Wolves keeper Rui Patricio chuan Kostas Tsimikias khung tur ṭha takin a dang a, Portugal keeper hian hun tawp dawn lamah Ahmed Hassan tauh luh tura ngaih a dansak bawk.

January thla khan Olympiakos aṭangin Wolves chuan winger Podence chu pound maktaduai 16.6 in an lalut a, a tir lamah beisei phak loin khelhna hmun pawh a chang mumal lo. July 12-a Everton an hmachhawn khan a vawi khat nan league-ah inkhel bul a ṭan ve chauh.

Kum 24 mi Podence hian theihna a nei sang a, striker Jimenez angin a palian lo a, winger Adama Traore angin thahrui a nei ṭha hek lo. Mahse, a thiam leh chet ranna hmangin a club hlui a chhaih buai nasa hle - penalty an hlawh theih chhan pawh a ni.

Wolves an chak avangin an lawm a, an goal chhuah chu VAR vangin an him leh  hram. Season kal laiah Nuno naute hian VAR thutlukna chu an tuar ṭhinah an ngai a, tun ṭumah erawh an lamah a ṭang ve taah an ngai. Twitter lamah pawh 'VAR kan duh reng' tih an ziak hial.

Premier League aṭanga teh chuan Wolves hian season tharah European football an khel phak dawn lo. Ticket an neih leh theihna awm chhun chu Europa League nomawi chawi a ni, quarterfinal-ah Sevilla hneh pawh ni se Manchester United leh FC Copenhagen inkhela chak zawk an tum leh dawn avangin a awlsam lo ang.

Wolves manager Nuno Espirito Santo chuan, "Tun season bik atan chuan Molineux Stadium-a kan match hnuhnung ber a ni ta, hun tawp hman huna fans an awm lo kha a khawhar thlak takzet. Season tharah chuan a boruak a danglam tawh ka beisei.

"Eng tiang chena thui leh hlimawm nge zinkawng kan zawh tawh ka chhut lo a, a pawimawh chu football vanga hlimna kan tawn hi a ni. Ka naute hnenah pawh tun chu chawlh hun a la ni lo a, kan hma lawkah hahchawlhna a awm thu ka hrilh," a ti.

Olympiakos coach Pedro Martins chuan, "Wolves nen vawi hnih kan inkhel a, match pahnihah khan team ṭha zawk kan niin ka hria. Football chuan kan duh loh result min chhawp chhuahsak chang a awm miau si, ka naute khelh danah erawh sawisel tur ka nei lo.

"Quarterfinal luh kan chak takzet a, chumi tur pawh chuan kan thawkrim hle. Kuminah kan tum ram thleng lo mah ila season tharah chuan Europa League chauh ni loin, inelna sang zawk Champions League-ah result ṭha neih kan tum ang," a ti.