Venghnuaiin BVT an barakhaih, an khingpui tur Salem Veng

LBS Suzuki 21st Inter Branch YMA Football Tournament-ah coach langsar Lalsangzuala Hmar enkawl Bethlehem Vengthlang chu Venghnuaiin 2-0 in an hneh. Inkhelh thiam veng BVT-in a vawi khat nana CYMA Football nomawi chawi an tumna chu Venghnuai lakah a thamral. Venghnuaiin semifinal-ah an ṭhenawm Salem Veng an hmachhawn dawn a, boruak a sang ang.

RG Stadium-a inkhelah BVT leh Venghnuai an inhnehtawk a, danglamna thlentu chu Lalremruata a ni. MPL U18-a FC Venghnuai champion puitu player pawimawh Remruata hian minute 39-naah mual dinglamah ṭha takin a lalut a, MPL best defender pawh ni tawh PC Laldinpuia lakah talput zuiin BVT player Emanuel Lalhruaizela'n box chhungah a pet tlu.

Venghnuai hian an hun ṭha neih hi an bawhpelh lo a, Hyderabad reserve team tana khel Laldanmawia rawn pen chhuakin BVT keeper Lalmuansanga a bum chiang hle.

BVT-in an nawr chhunzawm nghal a, first half injury time-ah Lalrammawia'n ball a pass sual Venghnuai player-in fing takin Malsawmzuala Tlangte tan a pe. MPL-ah pawh forward ṭha zinga mi Sawma Tlangte hian dinglam kilah ngil taka khalh pheiin Rammawia'n a umpha lo a, ṭha zetin a pet goal.

First half-ah Venghnuaiin 2-0 in hma an hruai a, coach ṭha Sanga tan a harsa sawt. Halftime-ah BVT an infuih ṭha a, second half-ah an goal bawh a na lehzual. Chutihrualin Venghnuai lamin an goal hnih neih an hmang ṭangkai a, goal venhim hna an thawk.

BVT-in striker ṭha an neih loh an tuar a, Venghnuai lamin goal venhim hna an thawh bawk avangin goal hmuh tur a awm lo. Rammawia'n hun ṭha a bawhpelh a, K. Lalṭhathanga (Puitea) hnuaia khel BVT goal hmaah an vannei tawk lo.

Venghnuai keeper Joel Lalramchhana'n BVT lakah goal a venghim a, hun tawp lamah BVT keeper Lalmuansanga insum zo loin keeper Ramchhana a tlawh lui. Muansanga hi hnawhchhuah a ni a, inkhel a tawp zui bawk.

Venghnuai coach K. Lalthlamuana chuan, "Kan vannei takzet a ni. Zirtawpniah last 16 kan khelh avangin Inrinni kan awl thei a, BVT erawhin Sialhawk an hmachhawn thung. Quarterfinal atan inpuahchahna hun an nei lo. Chutihrualin ka naute ka fak a, kan thawhhona ṭhat rah kan seng. Sanga hote hneh hrim hrim pawh hi kan tan chuan chanchin lawmawm a ni," tiin Vanglaini a hrilh.

Football-ah Venghnuaiin sulhnu ṭha an hnutchhiah chho zel a, MPL Under 18-ah nomawi an chawi zawn bakah Mizoram chhunga football inelna sang ber Mizoram Premier League-ah veng club-in final an thleng thei. Tunah erawh CYMA Football champion beiseina an nei a, mah se Mizoram World Cup ti hiala an chhal football inelnaa champion tur chuan veng ṭhenawm Salem Veng an hneh a ṭul dawn.