Chenna ngai loh ramah Tlangnuam

Tlangnuamin CYMA Football-ah semifinal an thleng. A sang pali zingah Tlangnuam hi an tel satliah a ni lo - champion ngun ber Armed Veng an hneh tawh a, champion rinkai ni phak ISL leh I League player kat nukna Durtlang an hneh leh bawk.

Nimin Lammual inkhelah first half-ah goal a lut lo a, second half-ah Tlangnuamin Vincent Lalduhawma hmangin hma an hruai. Minute sarih chiah a awm tawh tihin Durtlangin Lalchungnunga hmangin siphurh an sut a, 1-1 in inkhel a tawp. Penalty shootout hmangin chak zawk zawn a ni a, Armed Veng laka chhanhim tawhtu keeper Lalbiakkima'n Tlangnuam chhanhim lehin football chanchina an hun tawn san ber lai a ni.

An var suau e

Tlangnuamin Armed Vengah Armed Veng an hneh thei a, quarterfinal lut turin YMA Mission Veng lakah goal nga ngawt an khung leh bawk. Veng mipui an phur tawh a, beiseina sang tak an neih avangin Lammualah veng mipui kawr var nen an thawk chhuak.

Durtlang hi team ṭha zawka ngaih ni mah se Zomuanthanga Stand khat tlata awm Tlangnuam mipuiten an veng player-te an tiphur hle. Tlangnuamin ṭha takin bul an ṭan a, Durtlang nen pawh an inkhel tawk.

Chutihrualin player nei ṭha zawk Durtlang erawhin goal hlauhawm an ngah zawk. Hmingthanmawia'n (Valpuia) crossbar chungah chiah ball a tauh a, Isaac Vanmalsawma pet goal sirah chiah a kal a, Lalchungunga ball tauh keeper Lalbiakkima'n ṭha zetin a dang bawk.

A goal ta

First half-ah goal a luh loh hnuin second half-ah goal a lut ta. Tlangnuam zawkin goal an khung. Minute 54-naah Zothanpuia ball vawrhluh chu Vincent Lalduhawma'n a um lut a, Durtlang keeper-in tibuai hman mah se Tlangnuam forward hi ṭang tlangin angle zim tak aṭangin a pet goal.

Tlangnuam thawm a ring a, chak beiseina a nung thar. Lammualah entu mipui 'Tlangnuam, Tlangnuam, Tlangnuam' tiin an au rual a, Durtlang ṭantute thawm a ring tawk lo.

Durtlangin siphurh sut ngei tumin an nawr a, Isaac-a freekick ṭha chu keeper Biakkima'n a dansak. A tawpah erawh Durtlangin corner an hmang ṭangkai a, defender chak ṭha Chungnunga'n minute 83-naah a tauh goal. Durtlang thawm a ṭha ve nghal.

Chhandamtu Biakkima

Tlangnuam an ṭang tlang a, goal dang an chhuah belh lo. Penalty shootout-ah pawh team pahnih an la intluk tawk hle. Vawi li ve ve an pet zawhah an la pet goal vek.

Durtlang tana panganaah Isaac Vanmalsawma a rawn chhuak a, ṭha zetin pet mah se Tlangnuam keeper Lalbiakkima'n a dang. Tlangnuam tan CVL Remtluanga a rawn pen chhuak a, Durtlang keeper-in dansak mah se keeper Vanlalchhuanawma'n goalline a pel hman. Referee-in CVL Remtluanga tan hun ṭha a pe leh a, Tlangnuam forward hian chakna goal a khung.

Tlangnuamin semifinal an thleng a, an tawn ngai loh ram an thlen avangin an veng mipui lawmna hi football ngaina tak tak lo chuan an hrethiam phak lo ang. Chutihrualin semifinal meuh an thleng tawh a, an zinkawng tawp mai loa nomawi nena khar an tum dawn a ni.