AIFF thuneitu sang zingah Lalnghinglova Hmar

India rama football thuneitu sang ber All India Football Federation (AIFF) president Kalyan Chaubey chuan, Indian football-in hma a sawn theih zawkna tur ngaihtuah chungin AIFF Core Committee a din a, AIFF kal dan uluk taka thlira vil tur mi panga zingah Lalnghinglova Hmar (Tetea Hmar) chu a tel.

Mizoram Football Association honorary secretary Tetea Hmar telna Committee-ah hian AIFF vice president NA Haris chu Chairman a ni a, Odisha lam mi Avijit Paul chu Vice Chairman niin, Tetea Hmar bakah Mulrajsing Chudasama (Gujarat) leh Vijay Bali (Punjab)-te chu member an ni.

AIFF core committee hi AIFF Finance committee ṭhutkhawm hma lawka din niin, an thuneihna a sang dawn hle - he committee hian AIFF chet velna hrang hrang vil chu an hna ber a ni dâwn a, budget leh sum chet vêl dan te, infrastructure lama hmalakna te, competition hrang hrang kalpui dan te, thawktu thar lâk leh chawlhtir dan te thlengin thuneihna an nei dawn a, AIFF hmalakna hrang hrang pawimawhte chu an enpui ṭhin ang.

Mi panga telna AIFF core committee hi tun hnai khan New Delhi-ah an ṭhukhawm a, hma an lak zel dan tur an rel bakah AIFF hmalakna leh kal dante chu an zirchiang a ni.

Hetihlai hian June 3, 2023 khan AIFF Constitution thar tur chungchang chu Supreme Court-in a ngaihtuah a, Core Committee inhmuh khawmnaa tel Lalnghinglova Hmar chu he hunah pawh hian AIFF hruaitu a nihna angin a tel.

Mizoram Football Association honorary secretary Tetea Hmar hi AIFF-ah hian executive committee member ni mekin, AIFF hnuaia league hrang hrang enkawltu League Committee-ah Chairman dinhmun a chelh mek bawk.